La Regenza ha approvà in project per la correcziun da la via dal Güglia. Il traject da las stortas da Kappella fin Malix vegn sanà durant trais onns en etappas.

La via dal Güglia collia il nord dal chantun cun l'Engiadin'Ota e cun las vals grischunas dal sid. Sco via da transit d'impurtanza naziunala serva ella tranter auter a l'avertura da la regiun turistica Lai‑Valbella. L'ultima amplificaziun generala da la via dal Güglia è vegnida fatga durant ils onns 1930. Dapi lura èn vegnids amplifitgads successivamain divers tschancuns.

La Regenza ha ussa approvà in project per la correcziun da la via dal Güglia sin il traject da las stortas da Kapella fin Malix. Parzialmain è la via là en in nausch stadi architectonic e n'ha nagin vial per velos. En il rom dal project vegn tranter auter schlargiada la via a 6,5 meters. En pli vegn endrizzà in vial per velos e da la vart da la val vegnan erigidas construcziuns da sustegn. Il project vegn previsiblamain realisà en trais etappas annualas. En coordinaziun cun la correcziun da la via vegnan er prendidas mesiras da protecziun cunter la canera. Ils custs totals importan circa 12 milliuns francs.