Navigation

Inhaltsbereich

Noss profil

Nus essan ina instituziun dal servetsch public responsabla per la projectaziun, la construcziun, il mantegniment ed il manaschi da las vias chantunalas e per las construcziuns cunter l’aua en Grischun. Tenor l’incumbensa da l’Uffizi federal da vias essan nus era responsabels per il mantegniment ed il manaschi da las vias naziunalas sin il territori dal chantun.

L’Uffizi da construcziun bassa è ina organisaziun che porscha servetschs. Nossas activitads dessan cuntentar optimalmain ils basegns da noss clients.

Noss clients principals èn ils gremis politics superiurs, las autoritads e divers uffizis da la confederaziun e dal chantun. Ultra da quai èn noss clients las vischnancas, las intrapraisas dal traffic public, ils proprietaris da conducts industrials e divers partenaris contractads sco era ulteriuras gruppas d’interess sco ils possessurs da terren lung las vias, las persunas che utiliseschan las vias, las organisaziuns da turissem, ils mastergnants e l’industria.

Nossas finamiras

Nus accumplin nossas incumbensas professiunalmain e respectain tant ils aspects economics sco ecologics.

Nus percepin ils giavischs ed ils basegns da la publicitad e nossa moda da tractar culs clients è nuncumplitgada e servetschaivla.

En quest senn ans stentain nus da porscher ina communicaziun adattada e posts da consultaziun e cussegliaders cumpetents. Nus tschertgain soluziuns per ils basegns da noss clients e motivain nossas decisiuns en moda transparenta.

Tut las collavuraturas e tut ils collavuraturs furman ensemen l’uffizi. Els porschan ils servetschs e collavureschan culs clients. Per ch’els possian ademplir lur incumbensas optimalmain en il senn da nossas finamiras, promovain nus la cumpetenza e responsabladad da noss collavuraturs grazia ad infurmaziuns planisadas e scolaziuns.