Navigation

Inhaltsbereich

La Via Lucmagn ha la funcziun d'ina via principala. Ella maina da la Surselva tras la Val Medel fin al cunfin cun il Tessin e fa accessibla la vischnanca da Medel (Lucmagn) e la fracziun Mompé Medel da la vischnanca da Mustér. Il medem mument è ella ina colliaziun impurtanta tranter il chantun Grischun ed il chantun Tessin.

Pretensiuns

Pervia da lur stadi manglus han ins stuì sanar las gallarias da lavinas existentas Scopi 1 e 2 ils onns 2017 fin 2020. En quest connex han ins danovamain tematisà l'augment da la segirtad d'enviern sin la Via Lucmagn. Il territori suenter il portal da gallaria nord è exponì ad in grond privel da lavinas. Bunamain la mesadad da la ristga iniziala sa basa sin sulettamain trais laviners.

Mesiras planisadas

Per proteger il tschancun duraivlamain da las consequenzas da distatgas da lavinas vegn la gallaria existenta prolungada per 320 meters cun la construcziun nova da la gallaria da lavinas Scopi 3. Grazia a questa prolungaziun vul ins en futur stuair serrar la Via Lucmagn en media mo pli 19 empè da 37 dis en consequenza da privel da lavinas.

Il project cumpiglia la reconstrucziun da la via da velos e da viandar e l'access als implants dal lai da fermada e l'access a la centrala nord da las gallarias da lavinas Scopi. Plinavant vegn la zona da repaus vischina rendida accessibla cun ina fermada dal bus publica.

Impurtanza dal project

Durant la construcziun dal mir da fermada Sontga Maria la fin dals onns 1950 han ins dischlocà la Via Lucmagn en il sectur dal lai da fermada dal fund da la val sin la costa da la val. La concessiun ha obligà l'Ovra electrica Rain Anteriur (ORA) da construir edifizis substitutivs equivalents. Tant per l'ovra electrica sco era per il Chantun èsi impurtant d'avair ina via da pass ch'è segira d'enviern. L'ORA vul cuntanscher ses implants da fermada en quel sectur era l'enviern ed il Chantun ha interess da tegnair averta la colliaziun tranter la Surselva ed il chantun Tessin durant l'entir onn. Ils partenaris han reglà en ina cunvegna l'extensiun e la construcziun nova da la gallaria Scopi 3.


Patrun da construcziun:  Chantun Grischun
Realisaziun:  2021-2024
Custs da construcziun:  16,3 miu. CHF

Gallaria da lavinas Scopi, visualisaziun Gallaria da lavinas Scopi, foto 1 Gallaria da lavinas Scopi, foto 2 Gallaria da lavinas Scopi, rumida da lavina