La Regenza ha approvà in project per curreger la via dal Bernina a l'access "Miralago Sid" al Lago di Poschiavo. Ils custs totals da quest project importan circa 3,6 milliuns francs. L'access da via na correspunda betg pli als standards actuals. El è memia stretg e chaschuna problems en cas da bler traffic e durant l'enviern. Ultra da quai è la surstructura da la via, che n'è betg resistenta a la schelira, en in nausch stadi.

En il rom dal project duai l'access "Miralago Sid", sin ina lunghezza da var 250 meters, vegnir construì tenor las normas. En connex cun il project èsi plinavant previs da construir in nov vial per sviar a sanestra e da schlargiar la punt "Miralago Sid". La punt che sparta da la via chantunala e che maina sur il Poschiavino tutga a la vischnanca da Brusio. Pervia da quai sto la vischnanca pajar ils custs dad 800 000 francs per schlargiar la punt. La punt serva sco via d'access a la deponia communala "Motta di Miralago" che duai vegnir engrondida en il rom d'in futur project communal.