Navigation

Inhaltsbereich

L'amplificaziun da differents trajects da vias sco er las mesiras da construcziun per il mantegniment vegnan a chaschunar er quest onn per part impediments da traffic dischagreabels. Da la glista dals plazzals da construcziun e da las indicaziuns davart las lavurs e davart ils impediments survegnan ins ina invista actuala per l'entir onn sut www.strassen.gr.ch > Baustellen.

Quest onn vegnan investids 160 milliuns francs per mantegnair a lunga vista la rait da vias dal chantun, cun ina lunghezza da bunamain 1400 kilometers. Latiers vegnan circa 60 milliuns francs per ils sviaments da Saas e da Küblis en il Partenz en il rom da la finiziun da las vias naziunalas. Las differentas lavurs èn necessarias per garantir la segirezza durabla ed in confort adequat da viagiar per las participantas e per ils participants da traffic. Malavita chaschunan questas mesiras savens tscherts impediments per participantas e participants dal traffic. L'uffizi da construcziun bassa fa dentant attenziun che – là nua ch'igl è pussaivel – ils plazzals vegnian rumids e ch'i stettian a disposiziun dus vials al traffic durant las fins d'emna e durant la stagiun auta. Las impressarias ed ils impressaris sco er l'uffizi da construcziun bassa supplitgeschan las participantas ed ils participants dal traffic d'avair la chapientscha necessaria per eventualas malempernaivladads.