En Svizra ed en l'exteriur vischin datti adina dapli persunas che viandeschan, che fan jogging e che van cun velo u cun velo da muntogna. Uschia crescha il squitsch tant sin ils territoris da recreaziun vischina sco er sin las destinaziuns turisticas. Per che tut las differentas sportistas e tut ils differents sportists da temp liber possian ir a chasa cun in'experientscha positiva, sto vegnir garantida ina coexistenza paschaivla sin la rait da vias e da sendas grischunas. En il territori alpin è il Grischun a la testa da quest sectur, ed er questa stad rinforza el sias activitads cun agid da la nova campagna da fairtrail.

Il Grischun – in vair paradis per persunas che viandeschan, che van cun velo da muntogna, che fan trail running, jogging e bler auter. Che questa convivenza è pussaivla, n'è betg ina casualitad. Dapi passa 10 onns vegn promovida la coexistenza, e quai sin differents plauns.

La campagna da communicaziun da fairtrail

Il Grischun sensibilisescha directamain ils giasts e las persunas indigenas cun ina campagna da communicaziun. La campagna sa numna "Fairtrail" e fa – cun umor – reclama per ina convivenza patgifica sin las sendas e vias. Sco material d'infurmaziun stattan a disposiziun videos che rendan attent las persunas che van cun velos da muntogna electrics a la convivenza ed al cumportament correct en la natira, ma er medias stampadas cun statements da viandantas e viandants, ciclistas e ciclists da muntogna gentils ch'ins scuntra a las staziuns, en il traffic public u en las telefericas.

Fairdinands e tenuta vivida

Sco part da la campagna da fairtrail è er in team da manadras e manaders d'excursiuns e da bikeguides – uschenumnads Fairdinands – en gir durant 40 dis d'acziun sin la rait da vias e da sendas en l'entir chantun. Ellas ed els discurran cun giasts e cun persunas indigenas, tschentan dumondas e returnan cun resuns utils per las destinaziuns e per il chantun Grischun. Lur rapports d'experientscha pon vegnir legids sin la pagina d'internet da fairtrail.

Fairtrail è dentant dapli che mo ina campagna da communicaziun. En il Grischun è fairtrail dapi blers onns ina tenuta vivida che vegn promovida tras la collavuraziun da differentas instituziuns e persunas – saja quai da l'Uffizi da construcziun bassa fin a l'Uffizi per economia e turissem, da Grischun Vacanzas fin a las destinaziuns turisticas, da la manadra d'excursiuns fin al bikeguide. Uschia pon vinavant tuts giudair cumplainamain la rait da vias e da sendas grischunas.

Mesiras invisiblas

Bleras mesiras da coexistenza n'èn betg visiblas per l'utilisadra u l'utilisader ed han lieu, per uschè dir, davos las culissas. Manegiads èn directivas, mussavias, fegls d'infurmaziun ed agids da planisaziun per las projectadras ed ils projectaders. Exister existan criteris per l'ambient, ina regulaziun da las linguas per il contact cun la clientella u ina glista da controlla per applitgar fotografias. Tut las basas stattan a disposiziun gratuitamain a las partenarias ed als partenaris en il chantun e vegnan amplifitgadas cuntinuadamain dapi in decenni.

Uschia ha il Grischun sviluppà vinavant las signalisaziuns per il traffic betg motorisà. Quellas èn s'etablidas en il fratemp al standard svizzer, sco per exempel las bandierettas marcantas per las gennas. Questa soluziun era vegnida elavurada en cooperaziun cun las represchentantas ed ils represchentants da l'economia d'alp e stat a disposiziun gratuitamain. E betg sco ultim èn er vegnids edids standards tecnics per pudair adattar las vias e sendas tenor aspects relevants per la segirezza, per exempel per franar las ciclistas ed ils ciclists da muntogna sin ils trails.