Prenda resguard cun cruschar e cun surpassar viandantas e viandants.
La rutas grischunas per velos da muntogna èn per gronda part trutgs e percurs singuls ch'èn er signalisads sco sendas da viandar. Las viandantas ed ils viandants han da princip la precedenza.
 

Serra giatters e saivs da pascular cur che ti als has passà.
Uschia eviteschas ti ch'il muvel scappia e procuras per blera bainvulientscha tar il persunal d'alp sco er tar las puras ed ils purs. 
 

Hajas quità da quai che ti giaudas sez: ina natira intacta, animals, plantas e tia buna reputaziun.
Va cun il velo da muntogna mo sin vias e sin sendas signalisadas. Ir a travers tras guauds e sur prada fa donn als animals, a las plantas ed e nossa reputaziun sco ciclistas e ciclists da muntogna.
 

Na fraina betg cun bloccar las rodas.
Quai fa donn al trutg u al percurs, ma er a tes material.
 

Na lascha betg enavos ruments.
En mintga vitg has ti la pussaivladad da dismetter correctamain tes ruments. Uschia tegnas ti quità dal mund alpin grischun.
 

T'equipescha bain.
Ultra da la chapellina, dals guants e dal scalin tutgan er ina protecziun cunter la plievgia ed ina protecziun cunter il fraid tar l'equipament da basa, perquai ch'ins sto er adina far quint cun ina midada da l'aura en il mund alpin dal Grischun.
 

Porta responsabladad.
T'infurmescha davart la previsiun da l'aura e davart las pretensiuns da la ruta tschernida per evitar che ti ta sfradentias e che ti ta stanclentias memia fitg. Sche ti tschernas ina ruta per ir cun il velo da muntogna, fas ti quai adina en atgna responsabladad.
 

Planisescha tia tura.
Grazia a guids da rutas e grazia a chartas spezialas per velos da muntogna che ti pos cumprar en ina libraria e grazia ad ina gronda purschida d'infurmaziuns en l'internet na perdas ti betg la via.
 

Ta notescha il numer da la polizia 117, dal clom d'agid 144 e da la guardia aviatica svizra da salvament (Rega) 1414.