In'activitad corporala regulara na rinforza betg mo ils musculs e l'ossa, mabain tegna er en schlantsch il spiert e l'olma. En la vegliadetgna daventa il moviment ina clav per independenza, sanadad e participaziun sociala – el prevegn a cupitgas, promova la mobilitad e porscha occasiuns per inscunters e cuminanza.

Il Post spezialisà per la promoziun da la sanadad s'engascha spezialmain per entusiasmar persunas pli veglias en il chantun per quest tema. Suenter che la campagna è vegnida realisada cun success il zercladur ed il fanadur 2025, vegn ussa fatg reclama per «ir segir» anc ina giada pli intensivamain il settember, l'october ed il november 2025. La finamira è quella d'infurmar e da motivar sistematicamain las persunas spezialisadas, las organisaziuns e las vischnancas da propagar la campagna en lur conturn – saja quai cun purschidas da curs, cun occurrenzas d'infurmaziun u cun empustar il material da la campagna.

Perquai che moviment en la vegliadetgna funcziuna il meglier, sch'el vegn fatg regularmain, segir e collià cun plaschair. Sin sichergehen.ch na chattan persunas interessadas betg mo instrucziuns ed exercizis pratics, mabain er inspiraziun, co ch'ellas pon integrar en moda ludica il moviment en il mintgadi. Cuminaivlamain pudain nus contribuir che persunas pli veglias en il chantun èn pli ditg activas, independentas e segiras per via.