Purschida per organisaziuns dals secturs sanadad e fatgs socials

Il Post spezialisà per la promoziun da la sanadad gida organisaziuns a realisar furmaziuns supplementaras per persunas spezialisadas e per persunas laicas engaschadas. Las organisaziuns tschernan sezzas ils temas da la promoziun da la sanadad e da la prevenziun ch'èn impurtants per lur collavuraturas e collavuraturs sco er per las persunas laicas engaschadas. Ellas fixeschan er il lieu ed il spazi da temp da la furmaziun supplementara.

Gruppa/s en mira

Persunas spezialisadas e persunas laicas engaschadas, ch'èn en contact cun persunas pli veglias che vivan a chasa.

Finamiras dal project

Las participantas ed ils participants èn sensibilisads per temas da la promoziun da la sanadad e da la prevenziun e san applitgar en lur mintgadi quai ch'els han emprendì.

Las participantas ed ils participants profitan dal barat d'experientschas vicendaivel e cun il Post spezialisà per la promoziun da la sanadad.

Las participantas ed ils participants enconuschan purschidas e servetschs d'organisaziuns chantunalas dal sectur da la sanadad e dals fatgs socials sco er dal Post spezialisà per la promoziun da la sanadad.

Cuntegns da la purschida

• Sustegn tar la tscherna dals temas e tar la tschertga da referents
• Promovidas vegnan furmaziuns supplementaras davart la promoziun da la sanadad e davart la prevenziun en la vegliadetgna sco er persunas che assistan e tgiran lur confamigliars, p.ex. prevenziun cunter cupitgas, sanadad da la bucca, nutriment, solitariadad, vischinanza-distanza, resilienza, controlla da sasez, cumpetenzas da vita, …
• Surpigliada dals custs per referenta/referent, limita dals custs 1500 francs
• Pauschala da 200 francs per il local d'occurrenzas e per l'alimentaziun

Cundiziuns generalas

• Interess e motivaziun da las organisaziuns da porscher furmaziuns supplementaras davart temas che promovan la sanadad.
• Contactar il Post spezialisà per la promoziun da la sanadad, inoltrar in formular da dumonda.
• Integrar il logo dal Post spezialisà per la promoziun da la sanadad sin flyers u sin invitaziuns.
• Metter a disposiziun material da sensibilisaziun dal Post spezialisà per la promoziun da la sanadad a chaschun da l'occurrenza.