« enavos

La Polizia chantunala dal Grischun dispona dapi l'onn 2017 d'in servetsch spezial Investigaziun da cybercriminalitad che cumpiglia set collavuraturas e collavuraturs.

Il servetsch spezial Investigaziun da cybercriminalitad maina atgnas proceduras d'investigaziun tar delicts cumplexs da criminalitad digitala e da cybercriminalitad. En quest sectur èn situadas ultra da quai l'analisa da malware, il reverse engineering, il tracing da criptomunaida, ma er investigaziuns en il darknet. Plinavant sustegnan las collavuraturas ed ils collavuraturs la polizia unifurmada tar l'investigaziun generala da criminalitad digitala e tar las investigaziuns da delicts convenziunals che han in connex cun datas digitalas.

Il cumbat da cyberdelicts pretenda collavuraturas e collavuraturs fitg qualifitgads. En il servetsch spezialisà lavuran tant emploiadas civilas ed emploiads civils sco er polizistas e polizists cun scolaziuns spezialas correspundentas. Ultra da quai dispona il servetsch spezial d'ina infrastructura specifica cun hardware e cun software speziala. Per lur investigaziuns vegnan consultads tut tenor basegn collavuraturas e collavuraturs da la forensica digitala u dal Post d'analisa criminala.

Nossa visiun

Cybercriminalas e cybercriminals na duain avair nagina schanza en il Grischun. Il chantun Grischun duai daventar in conturn nunprofitaivel cun cundiziuns pli difficilas per cybercriminalas e cybercriminals. Ultra da las investigaziuns sa deditgescha il Servetsch da cybercriminalitad perquai er al suandant:

• Sensibilisaziun da la populaziun cun contribuziuns en las medias socialas
• Promoziun globala ed interdisciplinara dal barat d'infurmaziuns cun partenarias e partenaris
• Defensiun preventiva da novas smanatschas
• Destrucziun da structuras cybercriminalas cun metodas innovativas
• Introducziun d'investigaziuns proactivas cunter pedocriminalas e pedocriminals

«Nus faschain il Grischun segir, er en il spazi virtual»