Mandats d'arrest publics da temps passads, documents istorics, unifurmas ed armas veglias e las pli novas, ma er perditgas dals cas criminals sensaziunals dals ultims onns èn exponids en il museum da la polizia grischuna. Bleras illustraziuns e blers objects raquintan chaussas plain tensiun, chaussas commoventas e divertentas e chaussas tragicas da l'istorgia da passa 200 onns da la polizia chantunala grischuna. Utensils d'infracturs, armas d'assassinats u valischs plainas da daners fauss, fotografias da lieus dal delict e fastizs fan regurdar ad acts criminals che han procurà da lur temp per grondas agitaziuns. Il gir tras il museum da la polizia grischuna mussa er cleramain il svilup rasant dal traffic sin via.

Infurmaziun visitader

Visitas guidadas tras il museum da polizia n'èn per il mument betg pussaivlas.

Il museum da polizia po vegnir visità senza preannunzia mintga emprim mardi dal mais (dano firaus cumandai), da las 14.00 fin las 17.00. Nus vulessan render attent ch'i vala ina vegliadetgna minimala da 16 onns per visitar il museum da polizia. Quai, perquai ch'i vegnan per part mussads exponats che n'èn betg adattads per uffants. Il museum è cuntanschibel cun sutga cun rodas e sur in ascensur.