Sa sentir segira u segir è ina part impurtanta d'ina buna qualitad da viver. Tge ston ins resguardar per sa proteger? René Schuhmacher dal post spezialisà Prevenziun dat recumandaziuns ad in'occurrenza d'infurmaziun da la Pro Senectute a Cuira. Per ch'il model da fatschenta «Engianar glieud veglia» n'haja nagin success.

«Vus As occupais da la segirezza, uschiglio na fissas Vus betg qua», lauda René Schuhmacher las senioras ed ils seniors. El mussa, tge ch'ins sto resguardar, sch'ins porta ina tastga da maun. «Serrai adina la tastga e na la laschai betg ord egl. La purtai sin la vart davant dal corp u la serrai sut il bratsch.» Ladras e laders sa trategnan savens là, nua ch'igl ha blera glieud. «Objects da valur pudais Vus er purtar en las tastgas internas da Vossa giacca», cusseglia il spezialist da prevenziun.

Adatg: Qua na discurra betg la polizia
Novitads schoccantas, cumbinadas cun pretensiuns en daners e cun squitsch da temp, èn in model da fatschenta d'engianadras ed engianaders. Quels pon schizunt fingir il numer da telefon da la polizia. La polizia na dumandass dentant mai daners per telefon. Perquai vala: «Nagina tema! Pendai simplamain si.» Uschia sa cloma er la campagna da prevenziun naziunala actuala cunter engianaders al telefon.

Ina participanta dal curs raquinta da collavuraturas e collavuraturs presumtivs da Microsoft al telefon. «Quels vulevan mo avair access a mias datas sur il team viewer», ha ella percurschì endretg. Engianadras ed engianaders utiliseschan pia er l'internet. Qua pon els simplamain fingir ina identitad faussa. «Sajas zunt precauta u precaut e na pajai mai daners a persunas che Vus enconuschais mo da l'internet», di René Schuhmacher. Per il svilup da pleds-clav dat il spezialist in exempel persunal cun mussar, co ch'ina gidamemoria po esser nizzaivla.

Las participantas ed ils participants sa barattan davart experientschas cun engianadras ed engianaders. Ina persuna è daventada victima d'in engion da tric. Cura ch'ella ha dà ad insatgi in da dus francs per il charret da cumpras, ha quella engulà inobservadamain duatschient francs da la bursa. «Na laschai mai guardar en Vossa bursa e na la mettai mai or da maun», cusseglia il spezialist sco finiziun.

Retrospectiva
Ils ultims dus onns ha la Polizia chantunala dal Grischun cuntanschì cun 16 referats davart la segirezza en la vegliadetgna dapli che milli senioras e seniors.