Dals 17 fin ils 21 da november è la Polizia chantunala dal Grischun stada preschenta cun in stan a l'exposiziun professiunala grischuna Fiutscher a Cuira. Per la sisavla giada han polizistas e polizists giuvens sco er persunas responsablas per il management da las resursas umanas infurmà davart la professiun captivanta da polizista u polizist. 117 classas da scola cun 3700 scolaras e scolars mirveglius dals stgalims superiurs dal Grischun han visità l'exposiziun Fiutscher.

Vast public

Al stan da la Polizia chantunala dal Grischun n'èn però betg mo s'infurmadas scolaras e scolars. Er il persunal d'autras exposituras ed expositurs ha mussà interess per la professiun da polizista u polizist. E durant la fin d'emna han las collavuraturas ed ils collavuraturs dal stan respundì las pli differentas dumondas dal vast public da tuttas vegliadetgnas. Tut en tut èn vegnidas dumbradas bundant 11 000 visitadras e visitaders. En in studio da televisiun ch'è vegnì endrizzà aposta per l'exposiziun professiunala, èn vegnidas producidas emissiuns davart la tscherna da professiun.

Sin la moto da polizia

Var 650 giasts pitschens e gronds al stan da la Polizia chantunala han prendì plaz sin la moto da polizia ed èn sa laschads fotografar. Tenor il resun d'intgins geniturs han lur uffants che han survegnì ina tala fotografia, anc ditg plazzà quella en in lieu prominent tar els a chasa.

Punctualmain per l'exposiziun professiunala steva a disposiziun er il film da reclama da la Polizia chantunala. Durant il di è quest film vegnì emess al stan ed ha fatg surstar baininqual giast.

Business Connections

Per l'emprima giada ha l'Uffizi da persunal organisà ina coordinaziun tranter divers expositurs dal chantun Grischun. La finamira era quella d'unir uschè blers expositurs dal chantun sco pussaivel al medem lieu da l'exposiziun e da promover il barat. Il stan da la Polizia chantunala era plazzà directamain visavi il stan dal chantun Grischun e quel da l'Uniun grischuna dals emploiads da vischnanca (UGEV). Uschia è sa sviluppà in stretg contact tranter ils differents partenaris durant ils dis da l'exposiziun.