Raiver, sa laschar giu cun la suga, ascensiun autonoma: Quai emprendan las polizistas ed ils polizists da la Polizia chantunala dal Grischun en l'instrucziun alpina da basa. Per elavurar accidents da sgol ed accidents da sport en territoris maltransibels u sin pistas da skis, en cuvels, cun far canyoning, sin sendas enferradas u per tschertgar persunas sparidas en il territori da muntogna è dumandada la Polizia alpina.

En il chantun Grischun cun sias vals stretgas e nunsurvesaivlas poi dar, che polizistas e polizists che na fan betg part da la Polizia alpina vegnan clamads en acziun per in cas en muntogna. Perquai survegnan tut las forzas d'acziun da la Polizia chantunala dal Grischun ina instrucziun da basa en questa funcziun speziala.

Questa instrucziun ha lieu mintga onn durant trais dis. Per l'ina vegn emprendida la teoria speziala, co ch'in accident en in territori maltransibel vegn registrà ubain vegn transmessa l'enconuschientscha dals materials. Per l'autra vegn exercitada l'applicaziun da la teoria cun raiver, sa laschar giu cun la suga e cun l'ascensiun autonoma a la suga. Uschia vegni garantì che la situaziun vegn sclerida en moda professiunala e segira.

Ils videos respectivs chattais Vus qua: Kapo GR (@kantonspolizei_graubuenden)