Zum Seiteninhalt

Indicaziun per inoltrar actas giuridicas

I n'è betg admess d'inoltrar actas giuridicas, dumondas u autras communicaziuns a maun d'in normal e-mail, fax u en ina furma sumeglianta. Cun quests meds da communicaziun na pon betg vegnir effectuads acts processuals valaivels. Per motivs da segirezza na vegnan betg acceptadas inoltraziuns d'actas giuridicas sin purtaders da datas electronicas (CDs, DVDs, clavettas USB etc.).

Correspundenza giuridica electronica - inoltraziuns segiras per e-mail
Dapi il 1. da schaner 2011 han las partidas sco er las advocatas ed ils advocats la pussaivladad da communitgar cun las dretgiras e cun autras autoritads giudizialas sin via electronica (art. 110 CPP [per tudestg u talian]). Las modalitads per la correspundenza giuridica electronica èn regladas en l'ordinaziun dals 18 da zercladur 2010 davart la communicaziun sin via electronica en il rom da proceduras civilas e penalas sco er da proceduras da scussiun e da concurs (CS 272.1 [per tudestg u talian]).

La procura publica n'è perentant betg obligada da respunder sin via electronica. Tant enavant ch'i na resulta nagut auter da la legislaziun u da la giurisdicziun, pertutga la correspundenza giuridica electronica en il chantun Grischun ad interim mo la retschavida d'inoltraziuns, dentant betg la consegna da decisiuns, da disposiziuns processualdirectivas, da citaziuns e.u.v. tras dretgiras ed autoritads.