Cun contribuziuns QC promova e mantegna l'agricultura cuntradas cultivadas tipicas e multifaras. Il chantun Grischun è dividì en plirs projects da qualitad da la cuntrada. Ils manaschis participads vegnan cussegliads entaifer 8 onns almain duas giadas tras biros ecologics, ed uschia vegnan registradas – en ils projects regiunals – las mesiras QC ch'effectueschan contribuziuns. Las contribuziuns QC èn divididas en quatter categorias:
A
|
Cultivaziun da culturas per promover la diversitad da l'utilisaziun/l'experientscha da la cuntrada
|
B
|
Mantegniment e promoziun da l'utilisaziun e da la diversitad da l'utilisaziun (mesiras annualas)
|
C
|
Mantegniment e promoziun da la varietad da las structuras e tegnair liber (mesiras unicas)
|
D
|
Creaziun da novas structuras/novs elements da la cuntrada
|
Las mesiras èn dependentas da las regiuns. Supplementarmain vegn pajada mintga onn ina contribuziun fundamentala per l'entir manaschi sin basa da las structuras da la cuntrada.
Nua ves jau mias mesiras QC?
En il geoportal pudais Vus chattar tut las mesiras QC, sche Vus zoomais Vossa unitad da cultivaziun.
Ultra da quai pudais Vus consultar ina glista da las mesiras QC sin Voss manaschi sur Agate sut Annunzia d'atun 2026 > Annunzia detagliada > Qualitad da la cuntrada.
Co poss jau annunziar mesiras unicas?
Subvenziunablas èn mo quellas mesiras unicas, ch'il biro ecologic cumpetent ha registrà a chaschun da la cussegliaziun. Planisais Vus ina mesira forestala per l'onn proxim? La procedura ed ils termins chattais Vus en ils formulars correspundents en il ePortal sut natira ed ambient. Videos d'instrucziun tar ils novs formulars digitals chattais Vus sin il chanal da Youtube dal UAG.
Nua chat jau dapli infurmaziuns davart la QC en il Grischun ed en mia regiun?
Ils rapports dals projects chantunals e regiunals chattais Vus qua.