Bainvegni tar l'uffizi per economia e turissem

L'uffizi per economia e turissem (UET) sustegna cun contribuziuns e cun emprests il svilup economic dal chantun Grischun. Sco furnitur da servetschs As cussegliain e gidain nus gugent.

Tge faschain nus per interpresas?

Nus As gidain a fundar u ad expander Vossa interpresa orientada a l'export. Projects innovativs pudain nus sustegnair cun contribuziuns, cun emprests u cun facilitaziuns fiscalas. Ultra da quai procurain nus per Vus infurmaziuns e contacts impurtants pertutgant temas sco per exempel evaluaziun dal lieu, zonas d'industria, finanziaziun, taglias e martgà da lavur u transfer da savida e da tecnologia.

Tge faschain nus en il sectur dal turissem?

Nus cussegliain furniturs da prestaziuns, organisaziuns turisticas, vischnancas e persunas privatas areguard promoziun d'occurrenzas, interpresas d'alloschament, infrastructuras turisticas, meds da transport ed indrizs d'ennavar, stabiliments da sport, purschidas turisticas innovativas e projects da cooperaziun. Ultra da quai essan nus Voss post da contact en il sectur dal sport da muntogna e da naiv.

Tge faschain nus per nossas regiuns?

Noss post da servetsch sustegna – en collavuraziun cun la confederaziun – cun contribuziuns e cun emprests il svilup da l'economia regiunala en il territori da muntogna, en l'ulteriur territori rural ed en las regiuns. Quests daners duain tranter auter rinforzar la cumpetitivitad sin plaun chantunal da las branschas cardinalas orientadas a l'export (turissem, industria, furmaziun e sanadad).

Tge faschain nus per las abitantas ed ils abitants e per l'administraziun?

Sco liom tranter la confederaziun e las vischnancas sustegnain nus noss partenaris interns ed externs e procurain per in andament effizient da numerusas retschertgas impurtantas.
In vast circul da persunas interessadas da l'economia, da la publicitad e da l'administraziun cussegliain nus cun agid d'infurmaziuns statisticas; paisa dain nus qua als secturs populaziun, economia, fatgs da construcziun e d'abitaziuns sco er turissem.

Nus ans legrain da Voss contact.

Uffizi per economia e turissem
Eugen Arpagaus