Cuntegn da la pagina

Descripziun dal program

 
Cun il program d'engaschament GastroCantina ans drizzain nus a persunas motivadas che derivan da l'hotellaria e d'autras professiuns. Las caracteristicas professiunalas e persunalas vegnan optimadas tras nossas magistras e tras noss magisters scolads per persunas creschidas sco er tras nossas spezialistas e tras noss spezialists da gastronomia, quai che augmenta las schanzas per las persunas che tschertgan ina plazza da puspè s'integrar en la gastronomia. Ultra dals programs d'engaschament gia existents dal UCIML cumplettescha quest program er il project "Maisa ta cuvra" en moda ideala. 

 

Finamiras principalas

 
Il stadi dal martgà da lavur po adina puspè sa pegiurar pervia da l'economia, e quai en disfavur da las lavurantas e dals lavurants. Tras quai perdan lavurantas e lavurants che han differentas qualificaziuns lur plazza da lavur. Il nov program d'engaschament GastroCantina sustegna persunas da la gastronomia a tschertgar ina plazza. A persunas motivadas che derivan d'autras professiuns po il program avrir er ina porta en la gastronomia. Las participantas ed ils participants han la pussaivladad d'approfundar abilitads existentas e d'emprender novas activitads a differentas plazzas da lavur da trenament. Gist uschè impurtant è il mantegniment d'ina structura dal di sco er la tgira da contacts socials a la plazza da lavur.
 
 

Champs da lavur

 
En il suandants champs da lavur pon las participantas ed ils participants extender ed approfundar lur enconuschientschas sco er emprender novs champs d'incumbensas:

  • tratgas chaudas e fraidas
  • service, buffet
  • nettegiament, linscharia
  • servetsch da currier tar furnituras e furniturs, furniziun regiunala

 
 

Accumpagnament

 
In team spezialisà accumpogna las persunas che sa participeschan al program. La cussegliaziun persunala che resulta, serva a reflectar champs d'emprender individuals ed ad amplifitgar quels tenor finamiras. 
 
 

Dumber da participantas e participants e durada dal program

 
Il program porscha a 15 fin 20 persunas che tschertgan ina plazza e durant maximalmain sis mais la pussaivladad da s'engaschar en differents champs da lavur en noss manaschi da gastronomia. Sch'ina participanta u sch'in participant dal program survegn la pussaivladad per in gudogn intermediar u per in engaschament durant il temp da participaziun, po ella u el interrumper il program pli baud.