Cuntegn da la pagina

Descripziun dal program

 

Dapi il settember 2005 ha er la regiun dal CIL da Tavau in program d'engaschament per generalistas e per generalists. En la chasa Von Sprecher ch'è situada directamain al lai da Tavau han persunas che tschertgan ina plazza e che vegnan assegnadas da differentas instituziuns (CIL, AI, SUVA, servetsch social regiunal, cussegliaziun professiunala dal chantun e.u.v.) la pussaivladad da profundar abilitads existentas e d'emprender novas activitads en differentas plazzas da lavur da trenament. Gist uschè impurtant è il mantegniment d'ina structura dal di sco er la tgira da contacts socials a la plazza da lavur. Dapi la primavaira 2006 vegnan purschids moduls da furmaziun cumplementars ch'èn obligatorics per tut las participantas e per tut ils participants dal program.

 
En la chasa Von Sprecher vegnan purschids ils suandants secturs da lavur:

  • manual / tecnic
  • creativ / textil
  • mercantil (curs da computer, lavurs da project, coaching da s'annunziar e.u.v.)
  • d'economia da chasa (manar l'alloschi da gruppas, linscharia, nettegiament)

La finamira primara è ina integraziun svelta da persunas che tschertgan lavur en l'emprim martgà da lavur. Per tschertgar ina plazza stattan a disposiziun en la chasa Von Sprecher l'internet, in terminal da plazzas ed ina stanza d'annunzias.

 
Ultra da las plazzas da lavur en gruppa en la chasa Von Sprecher èsi er pussaivel che participantas e che participants vegnan incaricads en plazzas da lavur individualas dad organisaziuns senza profit da la regiun dal CIL da Tavau.
 

La durada dal program d'engaschament è mintgamai dependenta da la situaziun persunala da la participanta u dal participant e dura tranter 1 fin maximalmain 6 mais per program.
Sche la participanta u sch'il participant dal program chatta ina plazza da lavur, vegn l'engaschament schlià d'in di a l'auter.

 
Autorisadas da sa participar èn tut las persunas assicuradas:

  • ch'èn dischoccupadas u parzialmain dischoccupadas 
  • che pon vegnir intermediadas u tar las qualas i duai vegnir examinà, quant enavant ch'ellas pon vegnir intermediadas
  • a las qualas in partenari da la CII paja lur participaziun.

 
A la fin dal program d'engaschament sto l'organisatura u l'organisatur ubain il manaschi che ha engaschà consegnar a las participantas ed als participants ina conferma (analogamain ad in attestat da lavur), en la quala vegnan numnadas las activitads ch'èn vegnidas pratitgadas da la participanta u dal participant sco er las enconuschientschas e las abilitads particularas ch'ella u ch'el ha acquistà.