Finamiras principalas
Las finamiras principalas dal program èn da sminiuir la distanza temporala dapi l'ultima experientscha professiunala, da promover ina structura dal di, da far ulteriuras experientschas e da cuntanscher qualificaziuns centralas. Questas qualificaziuns centralas cumpiglian:
- la cumpetenza persunala (confruntaziun cun atgnas fermezias e deblezzas)
- la cumpetenza sociala (lavur da team, communicaziun)
- la cumpetenza metodica (process da schliar problems, tecnica da lavurar, tecnica da contractar, tecnica da vendita, tecnica da preschentaziun)
Plinavant pon las participantas ed ils participants elavurar attestats e referenzas e survegnan – cun la lavur da project – la pussaivladad da stabilir contacts cun patrunas potenzialas e cun patruns potenzials e d'extender lur rait persunala.
Ultra da quai ha il program d'engaschament l'avantatg ch'el mitigescha da vart da las patrunas e dals patruns fermamain il signal negativ da la dischoccupaziun, perquai che las persunas che tschertgan ina plazza pon cumprovar patrunas e patruns sco er ed attestats da lavur actuals. En general vegnan ils programs d'engaschament acceptads bain ed els survegnan bunas notas da la perscrutaziun d'evaluaziun quantitativa la pli nova (funtauna: www.amosa.net ).
Lavur da project
En il center da la participaziun al program stat la lavur da project. Ella dovra circa 80% dal temp. En projects concrets per organisaziuns senza profit pon las participantas ed ils participants far valair lur resursas e lur fermezzas, surpigliar responsabladad e scolar ina savida concepziunala e quai en pitschnas gruppas en il rom d'engaschaments pratics da lavurs. La lavur da project per instituziuns socialas, culturalas e pedagogicas sco per l'administraziun chantunala pussibilitescha ina invista da novs champs d'emprender e da lavurar. Durant l'emna d'entrada survegnan las participantas ed ils participants ina introducziun en il manaschament da projects.
Accumpagnament
In team spezialisà accumpogna las persunas che sa participeschan al program. Ultra da la lavur en ils projects ed il coa¬ching per s'annunziar per ina plazza survegnan ellas in stretg accumpagnament tras cunvegnas da fina¬mira ed en discurs davart la situa¬ziun actuala.
La cussegliaziun persunala che resulta, serva a reflectar champs d'emprender individuals ed ad amplifitgar quels tenor finamiras.
Furmaziun supplementara
Ina giada l'emna vegn manà tras – cun ina accumpagnament cumpetent – in entir di da furmaziun cun tut las participantas e cun tut ils participants. Il cuntegn da questa furmaziun supplementara èn temas davart la tschertga d'ina plazza e davart la promoziun da las qualificaziuns centralas.
Chaussas administrativas
Il temp da lavur importa 40 uras ad emna cun in pensum da 100%. Da quai resulta ina preschientscha quotidiana dad 8 uras. Il temp da lavur è fix e dura da las 08.00 fin las 12.00 e da las 13.00 fin a las 17.00. Da quest temp pon las participantas ed ils participants impunder in'ura a di (tar 100%) per scriver annunzias. Il di da curs dura la preschientscha da las 09.00 fin las 12.00 e da las 13.00 fin las 16.00. Messas a quint vegnan 8 uras.
Durant la participaziun al program pon vegnir retratgs dis da vacanzas, premess che dis senza controlla sajan avant maun.
Sch'i dat la pussaivladad per in gudogn intermediar u per in engaschament durant il temp da participaziun al program, po il program vegnir interrut pli baud.
Cundiziuns per sa participar al program
- motivaziun, interess e plaschair per champs d'incumbensa enconuschents e main enconuschents
- bunas enconuschientschas dal tudestg (tudestg da scrittira è cundiziun, dialect na vegn betg pretendì stringentamain)
- enconuschientschas da basa dal computer
- nagins problems acuts cun alcohol, cun drogas u cun medicaments che restrenschan l'engaschament