Las qualificaziuns professiunalas vegnan cumprovadas cun in examen cumplessiv, cun ina cumbinaziun d'examens parzials u cun autras proceduras da qualificaziun renconuschidas. Quests examens valiteschan ed accentueschan en ina moda equilibrada las parts a bucca, en scrit e praticas tegnend quint da las particularitads da la professiun correspundenta e resguardan en cas da relaziuns d'emprendissadi las notas d'experientscha da la scola e da la pratica. Tgi che ha percurrì cun success la procedura da qualificaziun survegn l'attestat federal da qualificaziun (AFQ) ubain l'attest federal da furmaziun professiunala (AFP).

Infurmaziuns impurtantas:
En l'ordinaziun dal secretariat da stadi per furmaziun, retschertga ed innovaziun SBFI davart la furmaziun fundamentala professiunala èn reglads:
• l'admissiun a la procedura da qualificaziun
• l'object, la dimensiun e la realisaziun da la procedura da qualificaziun
• il reussir l'examen, la calculaziun e la valitaziun da las notas
• las repetiziuns
• ils cas spezials