Persunas directivas giogan ina rolla centrala, sch'i va per francar l'egualitad e l'inclusiun en interpresas. Quatter persunas dal cader suprem d'interpresas grischunas han tratg glindesdi, ils 12 da favrer 2024 in facit a chaschun da l'occurrenza «Diversity in Leadership & Tech: francar la diversitad». I ha gì num: Nus na faschain betg anc avunda.
La discussiun al podium a la fin da l'occurrenza «Diversity in Leadership & Tech: francar la diversitad» ils 12 da favrer 2024 en l'auditori da la Banca Chantunala Grischuna a Cuira ha mussà: Interpresas grischunas fan (anc) memia pauc per recrutar, tegnair e promover models da viver multifars e talents. En vista a la mancanza da persunas spezialisadas e da forzas da lavur è il tema diversitad ed inclusiun daventà pli urgent; pledentadas vegnan cunzunt dunnas sco lavurantas. «Nus na pudain betg pli ans prestar da far nagut», ha postulà Sandra Daub, commembra dal cussegl d'administraziun Inventx e CMO Noumena. Tenor l'avis dad Andrea Fanzun, CEO Fanzun SA e president da la Chombra da commerzi ed associaziun dals patruns dal Grischun, vegn gia fatg bainquant, ma: «Probablamain na faschain nus quai betg bain avunda.» Martina Müller-Kamp, commembra da la direcziun e manadra da prestaziuns da martgà BCG, vesa in problem en il proceder distatgà: «Sche nus vulain promover dunnas confurm a lur basegns, stuain nus l'emprim chattar ora, tge ch'èn lur basegns.» Christian Thöny, president dal cussegl d'administraziun Cedes, vesa cunzunt la direcziun sco responsabla: «Topdown fa il pli grond effect.»
Questa vista reflectescha er las explicaziuns da la referenta da la saira, Ines Hartmann. La co-directura dal Competence Centre for Diversity & Inclusion al Post da perscrutaziun per management internaziunal da l'Universitad da Son Gagl ha documentà scientificamain, nua che l'economia svizra ed en spezial la branscha da tecnologia sa chatta areguard l'egualitad e l'inclusiun. Las enconuschientschas derivan dal «Gender Intelligence Report» che l'Universitad da Son Gagl edescha mintga onn cuminaivlamain cun Advance e che sa basa sin ina retschertga en firmas svizras cun pli che 100 collavuraturas e collavuraturs.
Francar sin tut ils nivels
Malgrà tut la buna voluntad èsi da superar blers obstachels structurals – gist en la branscha da tecnologia. Uschia van nov da diesch promoziuns en interpresas da tecnologia a favur da collavuraturas e collavuraturs en plazzas a temp cumplain. «Quai correspunda plitost al model d'activitad da gudogn masculin che feminin», uschia Ines Hartmann. Promoziuns vegnan savens fatgas tranter 30 e 40 onns – gist en las «rush hours of life», cura che bleras persunas fundan ina famiglia.
Ensemen cun la «cultura da lavur a temp cumplain» en la branscha da tecnologia ha quai consequenzas fatalas: Pli che la mesadad da las dunnas bandunan la branscha da tecnologia en la vegliadetgna tranter 30 e 40 onns, sco in studi da McKinsey di. Quai èn pli ch'il dubel dunnas che umens. Las dunnas mancan alura er en la direcziun: Mo gist 18 pertschient importa la quota da dunnas en il cader mesaun e superiur da la branscha da tecnologia, en cumparegliaziun cun 24 pertschient da l'economia generala.
La francaziun da la diversitad e da l'inclusiun en interpresas, uschia Hartmann, saja centrala per utilisar il pool da talents – e quai sin tut ils nivels dal management: en la visiun, en la strategia ed en la realisaziun, munida cun avunda resursas. La finamira saja, che uschè bleras collavuraturas ed uschè blers collavuraturs sco pussaivel possian furnir la meglra prestaziun. «Pir cura che l'inclusiun è er dada, sa mussa il niz da teams multifars», ha declerà Ines Hartmann. Nus tuttas e tuts sajan periclitads da giuditgar tenor stereotips. «Structuras davart la francaziun da la diversitad e da l'inclusiun ans gidan da betg ans laschar cugliunar da quests stereotips.»
Barat animà sin la plazza da fiera
Impuls multifars, co che la francaziun en l'interpresa po vegnir fatga, ha purschì il «martgà da las bunas ideas», preparà da persunas spezialisadas sco er da la ewz, da la Banca Chantunala Grischuna (BCG) e dal CSEM davart temas sco mesirabladad e finamiras, raits, furmas d'organisaziun u cultura d'organisaziun. La purschida da barattar ideas è vegnida utilisada savens da las var 130 participantas e participants.
Diversity-gr porscha ina plattafurma ad interpresas da la branscha da tecnologia ed ad initerpresas cun champs professiunals ch'èn pertutgads da la transfurmaziun digitala. La rait pussibilitescha da barattar experientschas, sensibilisescha per contexts e dat impuls per process da midament. Ella vegn purtada dal Post da stab per l'egualitad da las schanzas per dunnas ed umens, dal Center d'innovaziun CSEM, da l'Academia Raetica, da la rait «Women in Tech Switzerland», dal Center da las IPM Grischun, da la Scola auta spezialisada dal Grischun e da la Scola auta da pedagogia dal Grischun.
In emprim discurs da lavur ha lieu la primavaira 2024 tar la Hamilton che tutga ensemen cun la BCG, la Cassa da malsauns publica (CMP) e markenkern tar ils emprims commembers da la rait Diversity-gr. Simon Neuner, CEO CMP, commember da la rait Diversity-gr, accentuescha il niz da la rait: «Il barat cun autras interpresas, la francaziun da la diversitad en la cultura da las firmas sco er la sensibilisaziun cuminaivla per la diversitad ans encuraschan.»
Ina commembranza è pussaivla a partir d'immediat. Ulteriuras infurmaziuns sut diversity-gr.ch.
L'occurrenza è vegnida pussibilitada grazia al sustegn finanzial da l'Uffizi federal per l'egualitad tranter dunna ed um, la BCG, la ewz, la Scola auta spezialisada dal Grischun e la CMP.
Christian Thöny, Sandra Daub, Andrea Fanzun und Martina Müller-Kamp. Foto: Yanik Buerkli.