"En Baviera van la tradiziun ed il futur a pér ed a pass. Il stadi liber tudestg è ina da las cuntradas culturalas europeicas las pli veglias ed a medem temp ina da las regiuns las pli modernas da l'Europa."

 La Baviera cumbinescha ina natira intacta cun ina vita pulsanta. Il panorama alpin e la culissa grippusa da la "Svizra francona" caracteriseschan la vista da la Baviera gist tuttina sco sias cuntradas fluvialas enturn il Main, il Danubi ed enturn la cuntrada da lais da la Baviera Sura. Passa 34 milliuns persunas han visità l'onn 2015 la destinaziun da vacanzas preferida da tut la Germania. La Baviera porscha cuntradas magnificas, cundiziuns optimalas per far sport e per sa recrear, ritgas ovras d'art e stgazis culturals sco er, natiralmain, l'ospitalitad bavaraisa.

Las duas regiuns metropolitanas da Minca e da Nürnberg èn lieus economics che prospereschan e centers culturals da renum mundial. Cun ina rata da creschientscha dal product naziunal brut real en l'autezza da 12,3 pertschient da l'onn 2010 fin l'onn 2015 occupa il stadi liber Baviera cun lunga distanza l'emprima posiziun en la cumparegliaziun dals pajais ed è il motor da creschientscha da la Germania. La populaziun da la Baviera è s'augmentada da l'onn 1995 fin l'onn 2015 per 850 000 persunas.

Art chattan ins en Baviera adina e dapertut. Chastels pumpus e catedralas festivas caracteriseschan las citads bavaraisas. Ils museums da la Baviera dattan suttetg a stgazis artistics da tut las parts da la terra, da tut las epocas e da tut ils stils.

Mintga onn carmala la festa d'october passa 6 milliuns visitadras e visitaders da tut ils continents a Minca. La festa populara la pli enconuschenta dal mund vala cun dretg sco simbol da la cumpagnia bavaraisa.

Recept da la Baviera: Obazda

Ingredienzas: Questa crema da chaschiel sa cumpona a 30 - 60 % da camembert e/u brie (eventualmain er romadur e/u limburger), chaschiel frestg, paintg, spezias ed extracts da spezias, tschagulas, sal. Ultra da quai dastgan vegnir agiuntads a l'Obazda er groma e proteins da scotga ch'al rendan main grass e pia in pau pli digestibel. In ulteriur avantatg da la groma è ch'i va pli lev da stritgar ora la crema da chaschiel. L'agiunta da proteins da scotga augmenta particularmain la valenza da proteins da l'Obazda, che va in pau a perder pervia dal paintg e pervia da la groma. Igl è er permess d'agiuntar ina pitschna quantitad da biera per render pli fin l'aroma. 
D'observar èsi ch'il puletg e la paprica èn spezias obligatoricas per dar il gust al Obazda. Ins al mangia stritgà ora sin paun u ensemen cun ina brezla.

Preparaziun: Las ingredienzas camembert, brie, limburger, romadur, groma, chaschiel frestg, proteins da scotga e paintg vegnan maschadadas ad ina pasta omogena fin che quella è uschè granellusa sco giavischà. D'observar èsi ch'i na dastgan vegnir duvradas naginas substanzas da conservar resp. nagins spessifitgants. Per al conservar po il Obazda vegnir stgaudà. Cas cuntrari sa mantegna el mo paucs dis.