"L'enviern sco er la stad carmala il chantun svizzer – l'unic cun las trais linguas uffizialas tudestg, rumantsch e talian – sportistas e sportists da tut il mund cun sias muntognas impressiunantas."

Il Grischun signifitgescha multifariadad: L'unic chantun triling cun las linguas uffizialas tudestg, rumantsch e talian è la regiun da vacanzas la pli gronda da la Svizra. Il Grischun signifitgescha muntognas imposantas e lieus da vacanzas da renum mundial sco San Murezzan u Tavau, dentant er lieus "pitschens e fins" cun in agen scharm. L'enviern è il Grischun in paradis per il sport da skis, la stad per viandar, ir cun velo da muntogna u per far wellness.

Il Grischun è natira pura: En il pajais dals capricorns hai num d'explorar 615 lais, passa 900 munts e 150 vals. Grondas attracziuns turisticas èn per exempel la funtauna dal Rain, la Ruinaulta sco "Grand Canyon" da la Svizra, la Viamala u il Parc naziunal svizzer sco territori selvadi il pli grond dal pajais e sco parc naziunal il pli vegl da las Alps.

Lavurar là, nua che auters fan vacanzas: Il Grischun è er attractiv sco lieu economic. In clima fiscal ch'è favuraivel per l'economia ed ina buna infrastructura porschan avantatgs dal lieu ad interpresas che lavuran sin plaun internaziunal sco er a manaschis pitschens e mesauns. Sco pajais da transit ha garantì il Grischun cun ses pass da vegl ennà il barat tranter il nord ed il sid. Pertutgant la tecnica da traffic è oz impurtanta spezialmain la Viafier retica. Sin la rait da 384 kilometers lunghezza pon ins observar numerusas construcziuns artifizialas, e dapi l'onn 2008 fa part la lingia da l'Alvra e dal Bernina dal patrimoni mundial da la UNESCO.

Recept dal Grischun: Capuns

© Gian Giovanoli

Ingredienzas: 400 g farina, 2 dl aua da latg (1/2 latg, 1/2 aua), 4 ovs, 1/2 tschadun pitschen sal, 1/2 cuppin ervas manizzadas (peterschigl, tschagugliuns, rosmarin, basilic), 200 g pulpa, 40 urtais per ca. 40 capuns, 50 g chaschiel grischun da muntogna grattà, 1 tschagula, 50 g paintg

Preparaziun: Crivlar la farina en ina cuppa e la maschadar ensemen cun l'aua da latg, cun ils ovs e cun il sal ad ina pasta da flutgets loma. Laschar pussar durant 30 minutas, agiuntar las ervas. Tagliar la pulpa en finas strivlas e la maschadar en la pasta. Sbuglientar ils urtais en aua da sal, als laschar sfradentar e sientar sin in sientamauns. Alura repartir pitschnas cullas da pasta sin ils urtais, volver ellas en las feglias sco en pitschens pachets. Stgaudar blera aua e laschar trair ils capuns en purziuns durant 15 - 20 minutas, stgars sut il punct da buglida, als prender ora cun in chaz furà, als laschar sguttar ed als metter a chaud cundids cun chaschiel. A la fin tagliar la tschagula en rundellas e la brassar en paintg chaud fin ch'ella è brina aurada. La repartir sur ils capuns.