"La regiun prosperanta quart gronda da l'Italia s'extenda sur ina cuntrada multifara da las Alps fin al Po e dal Lago Maggiore fin al Lai da Garda."

Situada en il center da l'Europa, è la Lumbardia la regiun da l'Italia la pli ferm sviluppada e la pli ferm populada.

Ina ritga ierta istorica e cuntradas fitg variadas la distinguan: passa 100 000 edifizis d'impurtanza per l'istorgia d'art u per l'istorgia sco claustras, turs e chastels, 10 000 edifizis e stabiliments sut protecziun da monuments, 9 patrimonis mundials da la UNESCO, passa 300 museums accessibels a la publicitad sco er lais, territoris rurals, ecosistems fluvials e chanals, collinas, pizs prealpins ed alpins. La Lumbardia è ina cuntrada cultivada marcada da lavur instancabla. L'uman ha construì terrassas e vias, chavà chanals, sauà prada ed emplantà bostgs. Passa in quart dal territori èn surfatscha verda e parcs.

Per quest motiv è la Lumbardia ina destinaziun turistica plain surpraisas: Tgi n'enconuscha betg il Dom da Milaun u il Teater da la Scala? Ma forsa na spetgan ins betg da scuvrir en tut la regiun stgazis culturals, artistics e natirals uschè excellents e d'experimentar l'amur per chaussas concretas e bellas en la moda, en il design ed en l'innovaziun. L'ultima renconuschientscha internaziunala da las prestaziuns da la Lumbardia è stada la surdada da l'Expo 2015 a Milaun: ina schanza da preschentar al mund in model, en il qual s'inscuntran il progress ed il mantegniment da l'ambient, la lavur ed il temp liber, l'ierta istorica e l'innovaziun tecnologica, las citads grondas e la natira intacta.

Recept da la Lumbardia: risot a la milanaisa

Ingredienzas: (per sis persunas) 600 g ris vialone, 100 g paintg, 80 g chaschiel grattà, 100 g magugl da bov, 2,5 l broda da charn, 30 g tschagula, 2 brevs safran, 1/2 magiel vin alv, sal tenor gust

Preparaziun: Far luar il magugl en ina chazzetta e nettegiar quel. Agiunscher la tschagula manizzada cun in toc paintg e stufar quella fin ch'ella è transparenta. Agiunscher il ris e brassar quel intginas minutas fin ch'el è levamain brin. Derscher il vin en la chazzetta e laschar svapurar il liquid. Truschar il ris d'in cuntin cun ina palutta da lain, agiunscher da temp en temp broda buglienta e laschar coier. Suenter la mesadad dal temp da coier derscher lien il safran dissolvì en in cuppin broda. Cur ch'il ris è cotg, agiunscher il paintg ed il chaschiel e maschadar bain tut. Laschar pussar in pèr minutas e servir.