"Il stadi federativ austriac cun la chapitala dal medem num ha survegnì ses num pervia da sia funtauna principala d'entradas, la producziun da sal. Oz ha Salzburg in renum mundial cunzunt sco lieu da naschientscha da Wolfgang Amadeus Mozart e pervia da l'enconuschent festival da Salzburg."

 Salzburg cun sia situaziun centrala en il center da l'Europa è enconuschent sin l'entir mund cunzunt sco regiun culturala. Las bellezzas da la natira, las numerusas attracziuns, la vasta purschida d'activitads da temp liber, l'istorgia da lunga tradiziun sco er la ritga ierta da cultura populara furman la basa per il success da la regiun turistica cun onn per onn circa 24 milliuns pernottaziuns.

Salzburg è er economicamain in stadi federativ ferm e quinta tar las regiuns las pli dinamicas e tar ils lieus d'investiziun ils megliers da tut l'Europa. Manaschis pitschens e mesauns èn la pitga principala da l'economia. Blers instituts da scolaziun e da perscrutaziun e 4 universitads han qua lur sedia.

Il festival da Salzburg carmala mintga onn amaturas ed amaturs da la musica. Persunalitads sco Wolfgang Amadeus Mozart, Herbert von Karajan, Christian Doppler, Michael Haydn, Dietrich Mateschitz u Hermann Maier eran ed èn da chasa qua. Tranter las attracziuns las pli bain frequentadas èn per exempel la citad veglia da Salzburg (patrimoni mundial da la UNESCO), la fortezza Hohensalzburg, la via autalpina dal Grossglockner, il parc naziunal Hohe Tauern, las cascadas da Krimml, il grond cuvel da glatsch "Eisriesenwelt" sco er numerusas turs e numerus chastels.

Recept da Salzburg: Salzburger Nockerl (Merenguettas da Salzburg)

Ingredienzas: 10 alvs d'ov, 6 tschaduns gronds zutger, 6 mellens d'ov, 6 tschaduns gronds farina, sal, paintg, giglidras u ampuaunas

Preparaziun: Sbatter l'alv d'ov cun ina presa sal, agiuntar il zutger in pau a la giada e sbatter ad in alv d'ov sbattì sco ina crema – dar tiers precautamain ils mellens d'ov e la farina crivlada. Metter la pasta en ina furma da scuflà unschida cun paintg e garnida cun giglidras u ampuaunas, furmar 3 grondas merenguettas, coier en il furn a 200 grads durant ca. 12 minutas. Betg avrir il furn en il fratemp! Cundir cun zutger en pulvra e servir immediatamain.