"Pervia da las bunas colliaziuns da traffic cuntanschan ins facilmain il chantun svizzer tranter ils quatter pajais cunfinants Svizra-Germania-Austria-Liechtenstein. Ed i vala adina la paina da far in viadi a Son Gagl ch'è dapi l'onn 1983 patrimoni cultural mundial da la UNESCO."

Situà tranter ils quatter pajais cunfinants Svizra-Germania-Austria-Principadi da Liechtenstein, è il chantun Son Gagl ina "Svizra en miniatura". El sa cumpona da differentas regiuns che sa cumpletteschan bain. Er areguard la cuntrada è il chantun varià: Il sid è marcà da valladas, tras las qualas culan il Rain, la Thur, la Linth e la Seez, il nord è ina miaivla cuntrada da collinas furmada da glatschers.

Il chantun Son Gagl è il spazi economic il sisavel grond da la Svizra e quinta tar las plazzas las pli productivas da l'Europa. Ils ultims onns èn s'etablidas numerusas interpresas internaziunalas da l'industria da metal, d'electricitad, da maschinas e d'auta tecnologia a Son Gagl. Ditg è la regiun stada in center internaziunal da l'industria da textilias. Anc oz è il pechel da Son Gagl ina da las textilias las pli preziusas.

La citad da Son Gagl è in center cultural. La baselgia e la biblioteca claustrala sco er il district claustral fan part dal patrimoni cultural mundial da la UNESCO. Er il teater professiunal il pli vegl da la Svizra sa chatta en la chapitala dal chantun. Las regiuns cumpletteschan la purschida cun teaters pli pitschens, cun museums sco er cun diversas tradiziuns.

Recept da Son Gagl: Maluns da la Val dal Rain

© Andreas Thumm 

Ingredienzas: 500 g tirc AOC da la Val dal Rain, 300 ml aua, 300 ml latg, 10 g sal, 50 ml ieli da ravun, 50 g paintg

Preparaziun: 1. Derscher il tirc en ina cuppa, coier l'aua ed il latg cun il sal, derscher sur il tirc, maschadar, cuvrir, laschar scuflar durant circa 3 uras. Il tirc po er scuflar sur notg. 2. Stgaudar l'ieli da ravun en ina padella da brassar, agiuntar il tirc ed al brassar maschadond fin ch'el è brin aurà. Mintgatant cuvrir cun in viertgel per in pèr minutas, per ch’ils maluns restian umids. Agiuntar paintg in pau a la giada, maschadar vinavant, fin ch'i èn sa furmadas mieulas brin auradas.

Cussegls: Agiuntar avant che servir in pau latg u groma. Savens vegnan las mieulas da tirc er cundidas cun zutger e bagnadas sin in tschadun en il café. Ellas gustan stupent cun buglia da maila u cun in cumpot da fritgs.

Funtauna text: Kurt Hanselmann, chasa editura FONA, "St.Galler Küche"