"En il Tirol dal sid s'uneschan la natira, la cultura e l'originalitad ad in'unitad inspiranta. Questa varietad sa reflectescha er en las trais linguas uffizialas – tudestg, talian e ladin."

Questa convivenza da dus spazis culturals caracterisescha decisivamain il territori al sid dal Brenner. Il Tirol dal sid è marcà d'influenzas alpinas e mediterranas. Quai s'exprima tant en la cuntrada sco er en la cuschina ed en la mentalitad da sias abitantas e da ses abitants.

Tranter il Brenner e Salurn viva e lavura ina populaziun da circa in mez milliun persunas; sper las gruppas etnicas tudestga e taliana exista er la cuminanza ladina en la Val Gerdëina ed en la Val Badia. Trais èn pia er las linguas uffizialas: tudestg, talian e ladin. La provinza giauda ina vasta autonomia ed è sa sviluppada en blers reguards sco regiun exemplarica da l'Europa. Circa 12 pertschient da la racolta da maila en l'Uniun europeica vegnan producids en la provinza da Bulsaun, il territori da cultivaziun il pli grond da l'Europa. Il turissem è il motor economic numer 1 e carmala mintga onn passa 5 milliuns giasts en il Tirol dal sid. Dapi l'onn 2009 posseda la provinza cun las Dolomitas er in patrimoni natiral mundial da la UNESCO.

Novs impuls han dà ils onns passads l'universitad libra da Bulsaun, l'institut da perscrutaziun EURAC ed il Museion – museum d'art modern e contemporan a Bulsaun, dentant er l'economia cun structuras pitschnas e mesaunas che focussescha pli e pli sin l'export e sin l'innovaziun.

Recept dal Tirol dal sid: Schlutzkrapfen (Ravieuls cun spinat)

Ingredienzas: Pasta: 150 g farina da seghel, 100 g farina da furment, 1 ov, 50-60 ml aua tievia, 1 tschadun grond ieli, sal 
Emplenida: 150 g spinat, buglì (circa 300 g spinat frestg), 50 g tschagula, 1/2 con d'agl, 1 tschadun grond paintg, 100 g quagliada, 1 tschadun grond parmesan, grattà, 1 tschadun grond tschagugliuns, 1 presa nusch-mustgat, grattada, paiver mieut, sal 
Auter: parmesan grattà, paintg brin, tschagugliuns tagliads fin

Preparaziun: Pasta: Maschadar las duas sorts farina, las furmar ad in rintg sin ina aissa da pasta ed ensalar. Sbatter l'ov cun l'aua tievia e cun l'ieli. Derscher il liquid en il center dal rintg da farina e truschar da l'intern vers l'extern ad ina pasta glischa. Laschar pussar la pasta sut in sientamauns umid durant 30 minutas.
Emplenida: Manizzar fin il spinat, stufar la tschagula e l'agl en il paintg, agiunscher il spinat e laschar sfradentar in pau. Agiunscher la quagliada, il parmesan ed ils tschagugliuns e cundir cun nusch-mustgat, cun sal e cun paiver. Maschadar bain. Passar fin la pasta tras la maschina da far pasta. Elavurar la pasta uschè svelt sco pussaivel, per ch'ella na sia betg ora. Furmar rundellas da pasta da circa 7 cm diameter cun ina furma radunda e glischa. Plazzar l'emplenida cun in tschadun pitschen entamez. Bagnar l'ur cun aua e plegar las rundellas sco mesas glinas. Smatgar ensemen ils urs immediatamain cun ils dets. Coier ils "Schlutzkrapfen" en aua da sal ed als metter sin in plat. Cundir cun parmesan, cun paintg brin e cun tschagugliuns e servir.
Temp da coier: 3-4 minutas

Tip: Ins po cumplettar l'emplenida cun tartuffels cotgs e passads tras il pasvit.

Vin: Pinot grigio dal Tirol dal sid