"Il Tessin è l'unic chantun talian ed è il chantun il pli al sid da la Svizra cun ils dus giuvels Lago Maggiore e Lago di Lugano. Il Tessin cumbina il clima mediterran, il flair talian e las tipicas virtids svizras."
Il Tessin, l'unic chantun da la Confederaziun svizra situà dal tuttafatg al sid da las Alps ed a medem temp l'unic chantun talian ha dus cunfins: las Alps al nord ed il cunfin politic al sid. Il chantun traversan impurtantas vias da traffic europeicas: la viafier e l'autostrada dal Gottard sco er l'autostrada dal San Bernardin.
Il chantun Tessin è in liom tranter differentas culturas e quinta tar las regiuns europeicas cun il potenzial da svilup il pli grond. Per pudair ademplir il meglier pussaivel sia funcziun sco intermediatur e sco partenari da las regiuns vischinas investescha il chantun sistematicamain per sviluppar las cumpetenzas e las qualificaziuns professiunalas da sias abitantas e ses abitants. Las trais citads las pli impurtantas èn la chapitala chantunala Bellinzona (cun ses chastels ch'èn patrimoni cultural mundial da la UNESCO), Lugano, la plazza da finanzas la terz gronda da la Svizra, e Locarno, nua ch'il festival da films ha lieu mintga onn. Lugano sper il lai dal medem num e Locarno al Lago Maggiore èn destinaziuns turisticas fitg appreziadas grazia a lur clima mediterran.
Il spiert cosmopolitic e la promoziun activa dals tratgs cuminaivels e da la solidaritad en la collavuraziun transcunfinala entaifer ed ordaifer il territori alpin, quai èn ils puncts centrals e las finamiras ch'il chantun Tessin persequitescha dapi onns cun success.
Recept dal Tessin: turta da paun
Ingredienzas: 1/2 kg paun alv vegl, 300 g (u dapli) zutger, 6 ovs, 1 cuppin mandels manizzads, 1 tschadun chanella, 1 tschadun cacau, nusch-mustgat, pelletscha da citrona manizzada, vaniglia, 6 amarettos, paintg, latg, nuschegls da pinia, mandels, 1/2 kg ivettas.
Preparaziun: Dar en ina terrina las flettas da paun, ils amarettos smulads e la pelletscha da citrona e bagnar cun latg buglient fin che tut è cuvrì. Cuvrir e metter a lomiar, truschar mintgatant. Cur che questa maschaida è tievia, la sbatter bain cun in tschadun da lain u cun in sbattin per che la pasta survegnia ina consistenza eguala. Agiuntar il zutger, ils ovs, ils mandels manizzads, la chanella, il cacau, in zic nusch-mustgat, la vaniglia e las ivettas lavadas. Derscher la pasta en ina u duas furmas fin ad in'autezza da 4 u 5 cm. Garnir cun nuschegls da pinia, cun mandels spaletschads e cun flocs da paintg. Coier 1 ura en il furn (15 minutas cun gronda chalira, alura 45 minutas cun chalira moderada). Laschar sfradentar e springir cun zutger en pulvra.
Funtauna recept: Patrimoni culinar svizzer