"Il Tirol vegn designà sco 'Il cor da las Alps'. Il Tirol giauda stima mundiala sco destinaziun turistica e porscha a las abitantas ed als abitants la qualitad da viver la meglra pussaivla ed in spazi economic stabil."
12 640 km² grond, 9 districts, 279 vischnancas e passa 700 000 abitantas ed abitants, 130 000 famiglias cun uffants en circa 290 000 chasadas. Il Tirol è in spazi da viver ed economic situà en il cor da las Alps ed en il center da l'Europa.
Lavurar là, nua che auters fan vacanzas. Quest slogan descriva quai ch'il Tirol signifitga: qualitad da viver. Da quai fa part ina natira intacta gist tuttina sco diversas pussaivladads da passentar il temp liber, in'economia sauna, diversas purschidas da furmaziun, in provediment da la sanadad excellent ed ina gronda appreziaziun da las famiglias. Qualitad da viver signifitga er segirezza. Il Tirol, la regiun muntagnarda, è in bel pajais, dentant er smanatschà da privels da la natira. Mo 12 pertschient da la surfatscha territoriala è zona d'abitadi permanent. Ma: Il Tirol fa tut per proteger ils umans, per prevair meglier ils privels e per pudair gidar svelt ed effectivamain en il cas urgent.
Interpresas modernas da renum mundial, ina classa mesauna solida, artisanadi vivì, in turissem pulsant ed in'agricultura che funcziuna bain èn las pitgas purtantas d'ina structura economica sauna. Vitiers vegnan l'attractivitad dal Tirol sco plazza scientifica cun persunal bain scolà e motivà.
Qualitad da viver e forza economica, progress e tradiziun, cultura e natira. Quai è il Tirol e sia populaziun.
Recept dal Tirol: Canedels pressads da chaschiel
Ingredienzas: 250 g tartuffels, 500 g paun da canedels, 100 g paintg d'alp tirolais, 100 g tschagula manizzada fin, 1/2 l latg tirolais, 3 ovs, 100 g chaschiel "Feiner Tiroler", 100 g chaschiel da muntogna tirolais, peterschigl manizzà, nusch-mustgat, sal, paiver, paintg culà
Preparaziun:
Coier ils tartuffels, laschar luar il paintg d'alp tirolais, stufar la tschagula fin ch'ella e brina aurada, ed agiuntar al paun da canedels, stgaudar il latg tirolais ed al maschadar cun ils ovs, cun il sal, cun la nusch-mustgat e cun in pau paiver. Derscher tut sur la pasta da canedels, tagliar en quadrins il "Feiner Tiroler" ed il chaschiel da muntogna tirolais, agiuntar ils quadrins a la pasta da canedels ensemen cun ils tartuffels splattitschads e cun il peterschigl e maschadar bain. Laschar pussar la pasta durant 30 minutas e furmar canedels plats, als brassar en il paintg culà ed eventualmain coier a fin en il furn, vitiers vegn purschida ina salata cundida cun ina sosa dad ieli da sem-zitga, aschieu, ina presa zutger, sal, paiver e tschagugliuns.
Tip: Agiuntai a la sosa empè da zutger in pau mel d'avieuls, aschieu da maila ed in con d'agl manizzà fin.