"Dal Lai da Constanza fin al Piz Buin n'èn la tradiziun e l'innovaziun nagin cuntrast."

Il Vorarlberg è ina regiun innovativa ed autamain industrialisada cun ina gronda conscienza da sia tradiziun. Al cunfin cun la Svizra, cun la Germania e cun il Liechtenstein è questa regiun sa sviluppada ils ultims onns ad in ferm lieu economic al vest da l'Austria, cun ina diversitad culturala e cun ina cumbinaziun unica d'in stil da viver urban e d'ina genuinadad recreativa.

Il center da la regiun è l'aglomeraziun Val dal Rain-Walgau cun las citads Bregenz, Dornbirn, Hohenems, Feldkirch e Bludenz. Quest spazi economic e cultural fitg animà vegn cumplettà da las culissas muntagnardas imposantas dal Montafun, da l'Arlberg, dal Bregenzerwald e dal Kleinwalsertal.

A l'abitant tipic dal Vorarlberg vegnan attribuidas qualitads sco diligenza, effizienza, avertadad, curaschi e plaschair da contacts. La prestaziun vegn appreziada en la populaziun gist tuttina sco la creativitad e l'engaschament persunal. Valurs sco cuminanza e famiglia han ina gronda paisa, sco ch'i mussan numerusas uniuns ed in grond engaschament en uffizi d'onur.

Recept dal Vorarlberg: Hafaloab (gnocs da semulina-tirc)

Ingredienzas: 2 cuppins latg, 1 cuppin semulina-tirc, 1 cuppin farina, 1 cuppin paun grattà, sal, paiver, nusch-mustgat, peterschigl manizzà, 1 fin 2 ovs entirs

Preparaziun: Stgaudar il latg en ina padella. Maschadar la semulina-tirc, la farina ed il paun grattà en ina cuppa, derscher il latg chaud surengiu e maschadar. Cundir cun sal, paiver, peterschigl manizzà e nusch-mustgat. Dar tiers 1 fin 2 ovs entirs. Furmar gnocs e coier levamain en aua da sal durant ca. 8 min.

Tip: Ils gnocs pon er vegnir emplenids cun charnpiertg. Els van bain a prà cun brassà-portg e cun ravas alvas.