Navigation

Inhaltsbereich

E-voting en il chantun Grischun

A partir dal 2024 pon persunas cun dretg da votar da tschertas vischnancas, incl. las Svizras ed ils Svizzers a l'exteriur annunziads là, votar ed eleger sin via electronica. Per utilisar il chanal da votaziun electronic ston ins s'annunziar ina giada. S'annunziar pon las persunas cun dretg da votar da las suandantas vischnancas: Domat, Landquart, Lumnezia, Puntraschigna, Poschiavo e Val Stussavgia.

Per s'annunziar

Co pon ins votar sin via electronica?

Persunas cun dretg da votar ch'èn s'annunziadas survegnan per posta in attest da votar cun tut las indicaziuns necessarias per la votaziun electronica. Cedels electorals e da votar na dovri betg, ils ulteriurs documents, sco p.ex. las explicaziuns tar ils projects da votaziun, vegnan mess a disposiziun en furma electronica: Projects actuals - Votaziuns (gr.ch)

L'urna electronica vegn averta quatter emnas avant la votaziun u elecziun il glindesdi a las 12.00 e serrada la sonda avant la votaziun u elecziun a las 12.00. Valair valan las uras localas svizras (CET resp. CEST).

In mussavia pass per pass ed ulteriuras infurmaziuns chattais Vus sin la plattafurma d'infurmaziun dals chantuns per e-voting ubain en il fegl d'infurmaziun per la votaziun electronica..

Plattafurma d'infurmaziun dals chantuns (evoting-info.ch)
Fegl d‘infurmaziun per la votaziun electronica

En cas che l'attest da votar va a perder, n'è la votaziun electronica betg pli pussaivla. Il material da votar per ina votaziun per correspundenza u a l'urna po vegnir retratg tar la vischnanca.

Segirezza tar e-voting

L'attest da votar cuntegna differents codes che represchentan impurtants elements da segirezza. Sche codes da controlla u autras indicaziuns dal portal dad e-voting na correspundan betg a las infurmaziuns sin l'attest da votar, valan las infurmaziuns da l'attest da votar. En cas da divergenzas entrai per plaschair immediatamain en contact cun la vischnanca cumpetenta sur: Vischnancas - Contact (gr.ch)

Las persunas cun dretg da votar vegnan supplitgadas da tractar l'attest da votar cun quità e d'al tegnair en salv fin a la terminaziun da la votaziun u elecziun.

Ultra da quai recumandain nus da controllar – avant che cumenzar cun il process da dar giu la vusch – sch'i vegn mussada la dretga pagina d'internet. In mussavia latiers ed ulteriurs tips per dapli segirezza datti sin la plattafurma d'infurmaziun dals chantuns.

Simpels tips per dapli segirezza | Plattafurma d'infurmaziun dals chantuns per e-voting (evoting-info.ch)