La regenza vegn incumbensada da preschentar al cussegl grond in model che promova er en il futur finanzialmain fusiuns da vischnancas sco ch'i fa il model actual sur il fond da gulivaziun da finanzas.
Qua èsi decisiv che las fusiuns da vischnancas vegnian iniziadas da las vischnancas pertutgadas sezzas e na vegnian da princip betg decretadas dal suveran.
Cuira, ils 9 da december 2009
Cahannes Renggli, Blumenthal, Augustin, Berni, Berther (Mustér), Berther (Sedrun), Bondolfi, Brandenburger, Buchli, Bundi, Caduff, Candinas, Cavigelli, Claus, Darms-Landolt, Dermont, Farrér, Fasani, Federspiel, Florin-Caluori, Gartmann-Albin, Geisseler, Hartmann (Champfèr), Kollegger, Krättli-Lori, Marti, Meyer-Grass (Claustra Vitg), Nigg, Parpan, Pedrini, Perl, Pfister, Portner, Quinter, Righetti, Rizzi, Sax, Stiffler, Thurner-Steier, Tuor, Vetsch (Claustra Vitg), Zanetti, Hartmann (Küblis), Cattaneo
Resposta da la regenza
Tenor l'art. 64 da la constituziun chantunala (CC; DG 110.100) sto il chantun promover la collavuraziun intercommunala e la fusiun da vischnancas per garantir che lur incumbensas vegnian ademplidas en moda cunvegnenta ed economica. L'art. 93 da la lescha da vischnancas è la basa per ch'il chantun possia promover fusiuns da vischnancas (LV; DG 175.050). Tenor l'art. 94 da la lescha da vischnancas vertenta e sut tschertas premissas po il cussegl grond disponer la fusiun d'ina vischnanca cun ina u cun pliras autras vischnancas, ma las vischnancas pertutgadas ston l'emprim vegnir tadladas. L'art. 94 LV n'è fin ussa anc mai vegnì applitgà.
La cuntraversa davart las structuras territorialas è daventada in tema politic permanent ils ultims onns. Las revisiuns da la constituziun chantunala, da la lescha da vischnancas e da la legislaziun davart la gulivaziun da finanzas (cf. missiva carnet nr. 12/ 2005-2006), l'approvaziun da pliras fusiuns da vischnancas, las discussiuns en connex cun la refurma da la giustia e cun la nova concepziun da la gulivaziun da finanzas e da la repartiziun da las incumbensas tranter il chantun e las vischnancas (NGF grischuna) èn stadas ed èn il motiv per ponderaziuns da princip davart las structuras futuras dal chantun.
La regenza ha manifestà repetidamain sia voluntad da refurma ed ha intensivà la promoziun da fusiuns da vischnancas. Per quest intent èn vegnids formulads puncts centrals da svilup tant en il program da la regenza 2005-2008 (ES 23) sco er en il program da la regenza 2009-2012 (ES 2). Las intenziuns correspundentas èn vegnidas concretisadas en la missiva cumplementara a la refurma da la giustia il cumenzament da l'onn 2009. La fin da l'onn 2008 ha la regenza incumbensà l'uffizi da vischnancas d'elavurar fin l'atun 2010 in rapport che cuntegna la basa da decisiun per la strategia futura en connex cun la refurma da vischnancas. Quest rapport vul ella preschentar al cussegl grond. Il rapport correspundent vegn er a cuntegnair decleraziuns davart ils eventuals instrumentaris da promoziun, tranter auter er davart la promoziun finanziala; ed el vegn a far explicaziuns generalas davart la moda da proceder per simplifitgar las structuras en noss chantun e per metter a disposiziun ils meds finanzials necessaris. Il cussegl grond vegn a tractar il rapport probablamain la sessiun da december 2010 ed el vegn alura a pudair dar las directivas en chaussa; el vegn a decider cun tge strategias ch'ins vegn a cuntanscher las finamiras da las refurmas da structura e tge concepziun che la futura promoziun da fusiuns da vischnancas vegn ad avair.
Fin ch'il rapport è avant maun vegnan accumpagnads ils projects da fusiun da vischnancas currents tenor il model vertent e finanziads en la dimensiun da fin ussa.
La regenza è pronta d'acceptar l'incumbensa e da tractar – en il rapport concernent la futura strategia da refurma da vischnancas – la dumonda, co che fusiuns da vischnancas duain vegnir promovidas en il futur en il rom da las pussaivladads finanzialas e co ch'i duain vegnir cuntanschidas las finamiras che vegnan aspiradas da la refurma da las structuras.
1. da mars 2010