Dapi ils eveniments tragics ed alarmants en il Giapun è la persvasiun da la populaziun svizra creschida che la forza nucleara crodia cun fitg gronda probabilitad davent sco opziun per producir energia, e quai betg mo en Svizra, mabain sin l'entir mund. La PBD accepta questa situaziun da partenza, tant pli perquai ch'ella ha formulà gia avant ils eveniments actuals la finamira da sortir a vista mesauna fin a lunga vista da l'energia atomara.
Sche l'energia nucleara croda davent, mancan in di 40% da l'electricitad producida en Svizra. Vitiers vegn ch'il consum d'electricitad vegn a s'augmentar – malgrà tut las mesiras d'effizienza – per passa 2% per onn (2010: 4%!), e quai pervia da differents svilups (p.ex. augment da la populaziun, diever da pumpas da chalur, extensiun da la mobilitad electrica e.u.v.). Davart la moda e maniera, co che quest manco duess vegnir cumpensà in di sa divergeschan las opiniuns fermamain. Gia avant ch'ils resultats dals scenaris energetics per la Svizra, che vegnan elavurads da la confederaziun suenter Fukushima, èn avant maun vegnan inoltradas intervenziuns sin tut ils stgalims politics e da tut las partidas politicas, uschia er en il Grischun. Las intervenziuns van en differentas direcziuns e sa cuntradin per part. Or da l'optica da la fracziun da la PBD sto la debatta davart questas intervenziuns vegnir fatga en moda cumplessiva, cun in focus strategic cler e betg sco ultim cun resguardar ils scenaris ch'èn vegnids elavurads da la confederaziun fin a la debatta energetica extraordinaria en las duas chombras federalas il zercladur vegnint.
Il tema "energia" è da gronda impurtanza per il Grischun, perquai che l'aua, il vent ed il sulegl tutgan tar las paucas resursas dal chantun e procuran, en spezial en regiuns periferas, per ina valurisaziun preziusa. Il futur energetic da la Svizra è pervia da quai central per il chantun.
En vista a l'impurtanza dal tema "energia" per il chantun Grischun, ma er resguardond las numerusas intervenziuns davart il tema "energia" dumonda la fracziun da la PBD la regenza resp. il cussegl grond d'organisar la stad/l'atun 2011 ina sessiun extraordinaria d'in u da dus dis davart il "futur energetic dal Grischun".
Cuira, ils 19 d'avrigl 2011
Felix, Kollegger (Cuira), Aebli, Buchli-Mannhart, Campell, Casty, Clalüna, Grass, Jeker, Koch (Tumein), Komminoth-Elmer, Lorez-Meuli, Mani-Heldstab, Michael (Donat), Montalta, Niggli-Mathis (Grüsch), Papa, Parolini, Pedrini (Roveredo), Stiffler (Tavau Plaz), Tscholl, Fausch, Gugelmann, Haltiner, Müller (Haldenstein)
Resposta da la regenza
Suenter ils eveniments gravants en il Giapun èn vegnidas inoltradas en il cussegl grond durant la sessiun d'avrigl 2011 tut en tut 15 intervenziuns parlamentaras davart il tema "energia". Sco ch'i vegn menziunà correctamain en l'incumbensa qua avant maun, van las incumbensas e las dumondas en diversas direcziuns che sa cuntradin per part. En vista a l'impurtanza da quest tema resguarda er la regenza quai sco raschunaivel da metter questas intervenziuns en in rom general e da tractar ellas en moda cumbinada, cur ch'ils scenaris ed ils resultats da la debatta extraordinaria d'energia da las chombras federalas èn enconuschents.
Suenter che la conferenza da las presidentas e dals presidents ha concludì sin basa da l'art. 11 da l'urden da gestiun dal cussegl grond (UGCG; DG 170.140) da far – en il rom da la sessiun d'avust 2011 – ina sessiun extraordinaria davart l'energia, po il giavisch da l'incumbensa vegnir resguardà sco ademplì en il senn da las sutsegnadras e dals sutsegnaders. Pia è el daventà obsolet. L'incumbensa vegn acceptada e po vegnir stritgada il medem mument.
7 da fanadur 2011