Dapi che la branscha d'energia sa stenta per ina liberalisaziun, en spezial dentant dapi il grev accident en l'ovra nucleara a Fukushima en il Giapun, è la politica d'energia futura svizra e grischuna dumandada da prender posiziuns cleras che garanteschan en noss pajais in provediment d'energia suffizient e segir sco er uschè independent sco pussaivel da l'exteriur. En quest connex sa tracti cunzunt er da la dumonda, da tge funtaunas che las energias duain derivar.
La forza idraulica ha gia adina giugà ina rolla impurtanta en il chantun Grischun.
Ils ultims onns n'èn novs projects da forza idraulica gronds betg pli vegnids cumenzads, en emprima lingia pervia da l'opposiziun d'interess locals, dentant er pervia da proceduras giudizialas pli che lungas per sclerir aspects dal dretg da l'ambient.
Cunzunt considerond l'accident menziunà en il Giapun na vegnian tendenzialmain betg construidas novas ovras nuclearas en Svizra en il proxim avegnir.
En quest senn dumondan las sutsegnadras ed ils sutsegnaders la regenza grischuna:
1. Co valitescha ella la politica d'energia futura da la Svizra e dal chantun Grischun?
2. È ella pronta da sustegnair activamain la construcziun da novs mirs da serra? Dastgass il project per in mir da serra Curciusa far quint cun in sustegn activ da la regenza grischuna?
3. Tge mesiras concretas è il chantun Grischun pront d'introducir per promover la producziun d'energias alternativas ed en tge temp?
Cuira, ils 19 d'avrigl 2011
Righetti, Tenchio, Rosa, Albertin, Augustin, Berther (Camischolas), Blumenthal, Bondolfi, Brandenburger, Burkhardt, Caduff, Caluori, Casty, Casutt, Casutt-Derungs, Cavegn, Clavadetscher, Davaz, Della Vedova, Dermont, Dosch, Fallet, Foffa, Furrer-Cabalzar, Geisseler, Grass, Hartmann (Champfèr), Holzinger-Loretz, Jenny (Arosa), Joos, Kappeler, Kasper, Koch (Igis), Kollegger (Malix), Krättli-Lori, Kunz (Cuira), Märchy-Caduff, Michael (Castasegna), Michel (Tavau Monstein), Montalta, Nick, Niederer, Niggli (Samedan), Papa, Parolini, Parpan, Pedrini (Roveredo), Peyer, Tomaschett (Breil), Tomaschett-Berther (Trun), Trepp, Troncana-Sauer, Valär, Vetsch (Pragg-Jenaz), Wieland, Zweifel-Disch, Jenny-Marugg (Claustra Vitg), Müller (Haldenstein), Pedrini (Soazza), Vincenz
Resposta da la regenza
1. La revisiun totala da la lescha d'energia dal chantun Grischun (LEG; DG 820.200) ch'è entrada en vigur per il 1. da schaner 2011 prenda en mira da gidar a cuntanscher las finamiras da reducziun e da substituziun a lunga vista d'ina "societad da 2000 watt", cun l'intenziun da reducir la svapur da CO2 ad ina tonna per abitanta e per abitant per onn. Per quest intent èn vegnidas definidas cleras finamiras da reducziun e da substituziun. Cun la strategia tschernida stoi da princip vegnir cuntinuà. Perquai che las mesiras da promoziun actualas dal chantun sa concentreschan principalmain sin la reducziun e sin la substituziun d'energias fossilas en il sectur d'edifizis, ston plinavant vegnir examinadas mesiras per duvrar en moda pli effizienta l'energia electrica sco er mesiras per reducir il consum d'energia, per exempel en il sectur dal traffic.
Ultra da quai è la regenza pronta – sco gia explitgà en la resposta a l'incumbensa Heiz (CR dals 29 da mars 2011, prot. nr. 275) concernent las finamiras e la strategia da la politica d'electricitad dal Grischun – da suttametter proximamain in rapport cumplessiv davart la situaziun actuala e futura en il sectur da l'energia electrica sco er davart la posiziun dal chantun areguard las finamiras ed areguard la strategia da la politica d'electricitad dal Grischun.
2. Ord vista chantunala vegni favurisà d'optimar e da renovar las ovras idraulicas existentas. Correspundentamain stattan er en il center la renovaziun resp. l'optimaziun d'implants d'accumulaziun existents. En il plan directiv chantunal figurescha il project Curciusa cun la menziun "tegnair avert opziuns". Perquai ch'il chantun ha la funcziun d'approvar projects d'ovras idraulicas, sto l'iniziativa per realisar tals projects vegnir prendida l'emprim da petentas e da petents interessads resp. da las vischnancas che han il dretg da concessiun. La regenza è dentant pronta da sustegnair projects che permettan ina construcziun resp. ina renovaziun raschunaivla ch'è economica areguard l'energia e giustifitgabla per l'ambient. Quai vala er per il project Curciusa, sche quel avess da vegnir reactivà e sch'el ademplescha las cundiziuns da basa legalas ed economicas correspundentas.
3. Cun l'indemnisaziun per cuvrir ils custs da la furniziun d'electricitad (ICF) per promover energias regenerablas sco er cun las disposiziuns da la nova lescha d'energia dal chantun Grischun (LEG; DG 820.200) datti gia differentas bunas pussaivladads per promover energias alternativas. In basegn d'agir legislativ supplementar en quest connex n'è betg avant maun.
7 da fanadur 2011