Dumonda Peyer concernent la rolla dal chantun areguard l'offerta Stoffel da surpigliar e da far investiziuns en l'hotel Therme a Val S. Pieder
Sessiun: 15.02.2012
Tenor rapports en las medias èn sin maisa differentas offertas per la cumpra e per ils projects d'investiziun posteriurs en l'hotel Therme a Val S. Pieder. Ina confinanziaziun tras il chantun n'è explicitamain betg vegnida exclusa en quest connex. Almain vegn quai declerà uschia da Remo Stoffel, in dals investiders pussaivels. Gist da quests, ma er dad auters rapports en las medias intervegn ins plinavant ch'igl han lieu numerusas inquisiziuns e proceduras giuridicas cunter quest cumprader ed investider pussaivel. Nus supplitgain la regenza da respunder las suandantas dumondas en quest connex:
1. Tge empermischuns ha il chantun Grischun resp. l'uffizi per economia e turissem (UET) fatg envers l'investider Stoffel?
2. Co giuditgescha la regenza il fatg ch'igl han d'ina vart lieu differentas inquisiziuns e proceduras cunter l'investider pussaivel Stoffel, tranter auter pervia d'eventuals delicts da taglia, pervia d'eventuals delicts da facultad e pervia d'ina eventuala sfalsificaziun da documents, e che posts chantunals collavuran da l'autra vart a medem temp stretgamain cun quest investider pussaivel?
3. Co declera la regenza il fatg che la procedura pervia da sfalsificaziun da documents, che concerna er la banca chantunala grischuna, è pendenta dapi plirs onns?
4. Co giuditgescha la regenza, sco autoritad da surveglianza, la pretensiun derasada en las medias ch'er la banca chantunala grischuna sa participeschia ad ina finanziaziun da las investiziuns a Val S. Pieder, cumbain ch'igl è pendenta ina procedura pervia da sfalsificaziun da documents cunter l'investider pussaivel Stoffel, en la quala è involvida er la banca chantunala grischuna?
Cuira, ils 15 da favrer 2012
Peyer, Pult
Resposta da la regenza
1. Il chantun po sustegnair la construcziun e la renovaziun d'infrastructuras sut tschertas premissas, per exempel sche la promoziun dal turissem en la vischnanca ed en la regiun correspunda ad in basegn da l'economia generala. Igl è ina da las incumbensas fundamentalas da l'uffizi per economia e turissem (UET) da sclerir – suenter ch'ils petents han inoltrà ils documents necessaris – gia en in stadi da project tempriv, sch'igl è pussaivel da promover in project planisà en il rom da la lescha per il svilup economic. En il cas qua avant maun è quai vegnì fatg cun contactar il cussegliader da la STOFFELpart. In'eventuala garanzia da contribuziun da vart dal chantun è chaussa da la regenza e vegn dada pir, cur ch'ils gremis cumpetents – en quest cas la vischnanca da Val S. Pieder – han prendì da lur vart ina decisiun.
2. Tenor l'art. 74 dal cudesch da procedura penala (CPP) po la procura publica orientar la publicitad sut tschertas premissas davart proceduras pendentas. Quai cun resguardar il princip da la presumziun d'innocenza ed ils dretgs persunals da las persunas pertutgadas. Inculpaziuns concretas e qualificaziuns giuridicas precipitadas èn da tralaschar en quest connex. Da princip na duain vegnir numnads nagins nums, nun ch'i sajan involvidas persunas d'in interess public e lur nums sajan gia enconuschents.
La procura publica conferma ch'igl hajan gì ed hajan anc adina lieu inquisiziuns penalas cunter signur Remo Stoffel. Principalmain sa tractavi e sa tracti da delicts presumtivs tenor ils art. 138, 158, 163 ss. e 251 dal cudesch penal svizzer (CP) (defraudaziun, gestiun malfidaivla, crims e delicts da concurs e da scussiun, sfalsificaziun da documents). Ina procedura è vegnida surdada l'onn passà a la dretgira. Duas proceduras èn anc pendentas tar la procura publica. En tut ils cas vala la presumziun d'innocenza.
Sut questa premissa ston vegnir considerads er ils scleriments dal UET menziunads sut il punct 1.
3. Tenor l'art. 6 LItCPP è la procura publica independenta en l'applicaziun dal dretg e suttamessa mo al dretg. La regenza surveglia la procura publica e la po dar directivas liantas davart l'adempliment administrativ da sias incumbensas. Da quai resulta che la regenza na po dar naginas directivas a la procura publica davart cas concrets. Uschia na po ella er betg prescriver a la procura publica da terminar ina procedura entaifer in tschert termin.
4. Sco institut autonom da dretg public è la banca chantunala grischuna (BCG) libra en sia activitad commerziala entaifer ils princips da la politica da fatschenta ed entaifer il rom ch'èn vegnids fixads dal cussegl da banca. Tenor l'art. 24 da la lescha davart la banca chantunala grischuna è la regenza l'organ chantunal da surveglianza tenor la lescha federala davart las bancas e las cassas da spargn. Sco organ da surveglianza na po la regenza ni influenzar l'activitad commerziala operativa da la BCG ni prender invista da singulas fatschentas (secret da banca). Dal rest valan er per la BCG e per la relaziun cun sia clientella ils princips numnads sut ils puncts 2 e 3.
26 d'avrigl 2012