L'art. 105 da la lescha federala davart il traffic sin via (LTV) conceda als chantuns il dretg d'imponer taglias sin ils vehichels e d'incassar taxas.
L'art. 10 da la lescha introductiva chantunala tar la lescha federala davart il traffic sin via (LItLTV) regla las taglias da traffic da vehichels a motor immatriculads. Per vehichels ston ins pia pajar mintga onn ina taglia da traffic. Quai vala er per vehichels a chadaina sco maschinas da pista. Talas na fan enconuschentamain betg diever da vias per ademplir lur incumbensa, ma vegnan tuttina engrevgiadas cun ina taglia sin il traffic sin via da 100 pertschient.
La taglia da traffic vegn duvrada per il traffic sin via. Exempels èn: vias, mantegniment, infrastructuras dal traffic, ovras da protecziun. Applitgond il princip dal giudider vul il legislatur che la taglia haja ina destinaziun fixa clera. Tgi che fa diever da la rait da vias, duai gidar a pajar ils custs correspundents tras ina taglia da traffic.
L'art. 12 LItLTV regla la liberaziun da la taglia. Da taglias da traffic vegni p.ex. desistì dal tuttafatg tar vehichels dal chantun, tar vehichels d'acziun d'instituziuns da la segirezza publica sco er tar tals d'instituziuns renconuschidas da la sanadad e dals fatgs socials. L'art. 13 regla la reducziun da la taglia. Ina reducziun da 50 pertschient datti per exempel per ambulanzas privatas e per autos da bara privats che pon vegnir duvrads mo per quest intent.
A favur d'ina liberaziun da la taglia da traffic per maschinas da pista pledan ils suandants puncts:
• il connex cun la rait da vias manca (er sche pistas da skis tutgan tar las surfatschas da traffic publicas tenor la scienza e la giurisdicziun vertenta);
• differents auters vehichels cun intents fixs survegnan ina liberaziun u ina reducziun da la taglia (cumond da l'egualitad giuridica);
• ils conturns economics e las cundiziuns generalas daventan adina pli difficils per la branscha da las telefericas resp. per l'economia da turissem, e la lavur administrativa duai vegnir reducida;
• sin plaun federal na vegn il pretsch da diesel betg liberà da la taglia sin ielis minerals (moziun 08.3604 dal cusseglier naziunal Roberto Schmidt), malgrà ch'i manca ina giudida e malgrà in tractament inegual envers autras branschas (p.ex. l'agricultura).
Per quests motivs incumbenseschan las sutsegnadras ed ils sutsegnaders la regenza d'adattar l'art. 12 LItLTV (DG 870.100) uschia, che maschinas da pista vegnan liberadas da la taglia da traffic.
Samignun, ils 12 da zercladur 2012
Tomaschett (Breil), Kunz (Cuira), Jeker, Aebli, Albertin, Augustin, Barandun, Berther (Camischolas), Bezzola (Zernez), Blumenthal, Bondolfi, Brandenburger, Buchli-Mannhart, Burkhardt, Caduff, Caluori, Campell, Casanova-Maron, Casutt, Casutt-Derungs, Cavegn, Claus, Clavadetscher, Conrad, Darms-Landolt, Della Vedova, Dermont, Dosch, Engler, Fallet, Fasani, Felix, Foffa, Fontana, Furrer-Cabalzar, Giacomelli, Grass, Gunzinger, Hartmann (Champfèr), Hartmann (Cuira), Heinz, Hitz-Rusch, Holzinger-Loretz, Jenny, Joos, Kleis-Kümin, Koch (Tumein), Kollegger (Cuira), Kollegger (Malix), Komminoth-Elmer, Krättli-Lori, Kunz (Fläsch), Lorez-Meuli, Mani-Heldstab, Märchy-Caduff, Marti, Michael (Donat), Montalta, Nick, Niederer, Niggli (Samedan), Parolini, Parpan, Perl, Peyer, Pfäffli, Righetti, Sax, Steck-Rauch, Stiffler (Tavau Plaz), Tenchio, Tomaschett-Berther (Trun), Trepp, Troncana-Sauer, Valär, Vetsch (Claustra Vitg), Vetsch (Pragg-Jenaz), Waidacher, Wieland, Berther (Segnas), Degonda, Kuoni
Resposta da la regenza
Per ils vehichels a motor immatriculads en il chantun Grischun paja la possessura u il possessur ina taglia da traffic annuala che vegn da princip calculada tenor la cilindrada u tenor il pais total dal vehichel, nun ch'i vegnian applitgadas tariffas fixas en cas spezials. La taglia importa maximalmain 3'000.– francs tar la taxaziun tenor cilindrada e maximalmain 5'000.– francs tar la taxaziun tenor pais. Ils detagls vegnan fixads dal cussegl grond (art. 10 da la lescha introductiva tar la lescha federala davart il traffic sin via, LItLTV; DG 870.100). Naginas taglias da traffic na vegnan incassadas per vehichels dal chantun, per vehichels d'intervenziun che vegnan duvrads d'instituziuns da la segirezza publica e per vehichels d'intervenziun che vegnan duvrads d'instituziuns dals fatgs da sanadad e dals fatgs socials e ch'èn renconuschidas dal chantun (art. 12 lit. a fin c LItLTV). Ina reducziun da la taglia da traffic da fin 50 pertschient survegnan vehichels communals che n'èn betg liberads da la taglia da traffic sco er vehichels en il servetsch public ch'èn endrizzads spezialmain per quest intent e che vegnan duvrads per quest intent (art. 13 al. 1 lit. a e b LItLTV). Il punct cuminaivel da tut quests vehichels è quel ch'els vegnan duvrads per intents che servan als interess da la generalitad. Maschinas da pista n'han betg questa qualificaziun, uschia ch'ins na po betg discurrer d'in tractament inegual.
I n'è er betg uschia ch'i manca in connex tranter las maschinas da pista e la rait da vias. In connex indirect è avant maun, sch'ins resguarda ch'ils territoris da skis dovran vias d'access d'in bun standard ch'èn mantegnidas bain. Igl è enconuschent en general ch'access nauschs èn da princip buns da tegnair davent eventuala clientella. Perquai èsi giustifitgà da pretender er da possessuras e da possessurs da tals vehichels ina tscherta contribuziun per cuvrir las grevezzas stradalas.
Il legislatur tegna gia oz considerablamain quint dal fatg che maschinas da pista n'utiliseschan betg u mo pauc la rait da vias, tras quai ch'ellas èn suttamessas mo ad ina pitschna taxaziun pauschala annuala. Per maschinas da lavur, a las qualas er las maschinas da pista appartegnan, ston uschia vegnir pajadas taxas annualas da 104.40 francs (per in pais total fin 3'500 kg) resp. da 198.80 francs (per in pais total da passa 3'500 kg) (art. 1 cifra 10 da l'ordinaziun dal cussegl grond davart la taglia da traffic per vehichels a motor e per chars annexs; DG 870.120). Las 365 maschinas da pista immatriculadas en il Grischun han en media in pais total dad 8'227 kg. Sche quest "vehichel da media" vegniss taxà tenor las tariffas da pais total normalas, stuessi vegnir pajà mintga onn – tut tenor la categoria dal vehichel – 1'123.20 francs fin 1'401.80 francs ed uschia pia circa tschintg giadas e mez fin set giadas dapli.
La finala stoi vegnir rendì attent che la regenza ha auzà per il 1. da zercladur 2012 dad 1 a 3 onns la durada da la valaivladad da las permissiuns spezialas ch'èn necessarias tenor il dretg federal per utilisar maschinas da pista. Per autras mesiras da distgargia finanzialas na vesa ella perquai nagin ulteriur spazi.
Per tut quests motivs propona la regenza da refusar l'incumbensa qua avant maun.
20 avust 2012