En il rapport davart la politica d'electricitad dal chantun Grischun che vegn tractà en la sessiun d'avust formulescha la regenza la finamira d'examinar la pussaivladad per interpresas industrialas che dovran blera electricitad da retrair electricitad per in pretsch favuraivel.
A las sutsegnadras ed als sutsegnaders pari dad esser pli raschunaivel d'offrir ina segirezza dals pretschs ad interpresas che dovran blera electricitad, per il cas ch'ils pretschs per l'electricitad avessan da s'augmentar fermamain e periclitassan uschia il Grischun sco lieu d'industria. Questa segirezza dals pretschs duai vegnir concedida dal chantun sco cuntraprestaziun a las cunvegnas davart l'effizienza energetica (p.ex. cun l'agentura d'energia per l'economia AEnEc) u a las obligaziuns da duvrar energias regenerablas.
Qua tras vegn la regenza incumbensada d'examinar las pussaivladads correspundentas fin l'onn 2015.
Cuira, ils 30 d'avust 2012
Kollegger (Malix), Jeker, Berther (Camischolas), Blumenthal, Buchli-Mannhart, Burkhardt, Caduff, Cavegn, Conrad, Darms-Landolt, Fallet, Fontana, Geisseler, Gunzinger, Hartmann (Champfèr), Hartmann (Cuira), Hitz-Rusch, Jeker, Jenny, Kleis-Kümin, Krättli-Lori, Meyer-Grass, Michael (Donat), Michael (Castasegna), Niederer, Parpan, Sax, Tscholl, Vetsch (Pragg-Jenaz), Waidacher, Wieland, Zanetti
Resposta da la regenza
En il rapport d'electricitad dal chantun Grischun fixescha la regenza la finamira d'examinar las pussaivladads per interpresas industrialas che dovran blera electricitad da retrair electricitad per in pretsch favuraivel (cf. la missiva da la regenza nr. 6/2012 - 2013, 390).
Cun l'incumbensa qua avant maun duai la regenza vegnir incaricada supplementarmain d'examinar la pussaivladad da porscher ina garanzia da pretsch a las interpresas che dovran blera electricitad per il cas ch'ils pretschs da l'electricitad s'augmentian e pericliteschian uschia il Grischun sco lieu d'industria.
Er or da l'optica da la regenza èsi raschunaivel d'examinar, sche l'electricitad po vegnir offrida a cundiziuns favuraivlas a las interpresas industrialas ch'èn domiciliadas en il Grischun e che dovran blera electricitad sco avantatg dal lieu en il senn d'ina mesira per promover l'economia per mantegnair resp. rinforzar lur cumpetitivitad. Per quai ston però vegnir fatgs scleriments pli detagliads.
Ina promoziun en il senn menziunà stuess en mintga cas vegnir colliada cun mesiras per augmentar l'effizienza energetica en las interpresas favurisadas, per ch'in tal project na cuntrafetschia betg a las finamiras da la lescha d'energia dal chantun Grischun e dal rapport d'electricitad.
La regenza è pronta d'acceptar l'incumbensa e d'examinar las pussaivladads correspundentas.
25 d'october 2012