A bleras sportistas ed a blers sportists è il center per ils sports da stad da l'uffizi federal da sport (UFSPO) a Tenero enconuschent. Mintga onn dumbra quel 130 000 pernottaziuns. Tenor in rapport da la gasetta NZZ am Sonntag dals 26 da favrer 2012 tschertga la confederaziun in center per il sport d'enviern. La confederaziun haja fatg sondagis ad Andermatt, perquai ch'ella tgiria gia oz là stabiliments da sport per las sportistas e per ils sportists da l'armada e d'elita.
Per las sutsegnadras ed ils sutsegnaders è il Grischun directamain predestinà da porscher in lieu per in center per il sport d'enviern. A Tavau per exempel dessi la pussaivladad d'exequir tut ils tipics sports d'enviern sin il nivel il pli aut. Gia oz ha la federaziun svizra da skis là ses center naziunal da trenament. Il hockey sin glatsch, il patinadi da sveltezza e blers auters sports han ina lunga tradiziun a Tavau. Ulteriurs lieus pussaivels fissan per exempel Cuira. Da là cuntanschan ins en pauc temp territoris da sport d'enviern enconuschents. Plinavant stess a disposiziun a S-chanf in stabiliment da militar ch'ins pudess eventualmain duvrar per in auter intent.
Las sutsegnadras ed ils sutsegnaders supplitgeschan perquai la regenza d'examinar lieus per in center per il sport d'enviern en il Grischun e d'inoltrar a temp las propostas a la confederaziun. Sch'i dat in center per il sport d'enviern en Svizra, sto quel esser en il Grischun.
Cuira, ils 31 d'avust 2012
Kunz (Cuira), Engler, Michael (Donat), Aebli, Albertin, Augustin, Barandun, Baselgia-Brunner, Berther (Mustér), Berther (Camischolas), Bezzola (Samedan), Bezzola (Zernez), Bleiker, Blumenthal, Brandenburger, Buchli-Mannhart, Burkhardt, Caduff, Campell, Casanova-Maron, Casty, Casutt, Casutt-Derungs, Cavegn, Clalüna, Claus, Conrad, Davaz, Dermont, Dosch, Dudli, Fallet, Felix, Foffa, Fontana, Furrer-Cabalzar, Gartmann-Albin, Geisseler, Grass, Gunzinger, Hartmann (Champfèr), Hartmann (Cuira), Heiz, Hitz-Rusch, Holzinger-Loretz, Jeker, Kappeler, Kasper, Kleis-Kümin, Koch (Tumein), Kollegger (Cuira), Komminoth-Elmer, Krättli-Lori, Kunz (Fläsch), Locher Benguerel, Mani-Heldstab, Märchy-Caduff, Marti, Meyer-Grass, Michael (Castasegna), Montalta, Müller, Nick, Nigg, Niggli (Samedan), Niggli-Mathis (Grüsch), Papa, Parolini, Pedrini (Roveredo), Peyer, Pfäffli, Pfenninger, Pult, Righetti, Rosa, Sax, Steck-Rauch, Stiffler (Tavau Plaz), Stiffler (Cuira), Tenchio, Tomaschett (Breil), Trepp, Troncana-Sauer, Tscholl, Vetsch (Claustra Vitg), Vetsch (Pragg-Jenaz), Waidacher, Wieland, Degonda, Fausch, Michel (Igis), Monigatti, Pedrini (Soazza), Pfister
Resposta da la regenza
Igl è correct che l'uffizi federal da sport (UFSPO) examinescha la realisabladad d'in center per il sport d'enviern ad Andermatt, dentant senza ch'i fiss vegnì fatg ordavant per quai in'evaluaziun dal lieu adattà en tut la Svizra. Andermatt è en il focus dal UFSPO en emprima lingia, perquai ch'il departament federal da defensiun, protecziun da la populaziun e sport (DDPS) dispona gia da la gronda part da l'infrastructura necessaria. Quest fatg permettess ina realisaziun relativamain "facila" ed a curta vista. Ultra da quai è Andermatt situà geograficamain central ed è cuntanschibel bain cun il traffic privat e public da tut la Svizra. Actualmain ha il project però anc il status d'ina fatschenta "interna dal DDPS". Fin la fin da l'onn 2012 duai vegnir sclerì, sche l'armada po desister da l'areal e da l'infrastructura ad Andermatt a favur d'in center naziunal per il sport d'enviern. Alura poi vegnir decidì davart l'ulteriur proceder.
La regenza beneventa las stentas per stgaffir in center naziunal per il sport d'enviern, damai ch'il turissem d'enviern è ina pitga impurtanta da la rendita per nossa economia e la promoziun da la nova generaziun ha ina gronda muntada per la prosperitad futura dal chantun. In "Tenero per il sport d'enviern" duai pudair vegnir duvrà tant da scolas, d'uniuns e da chantuns per champs cun uffants e giuvenils sco er per scolaziuns. Las pretensiuns concernent l'infrastructura èn vegnidas definidas dal UFSPO ed èn enconuschentas a la regenza.
Tenor emprimas stimaziuns approximativas quinta il UFSPO cun var 46 000 pernottaziuns per onn en in center per il sport d'enviern. Quai correspunda a bunamain 1 % da las pernottaziuns en il chantun Grischun. Tenor l'experientscha vegnan ultra da quai intginas participantas ed intgins participants da champs u da curs a returnar al lieu, cun il qual ellas ed els collian regurdientschas ed emoziuns positivas. In center per il sport d'enviern è perquai er in'occasiun ideala per preschentar a las gruppas odiernas e futuras che fan sport d'enviern e sport sin il glatsch las pussaivladads excellentas al lieu.
Malgrà ch'in pèr facturs pledan per realisar in center ad Andermatt, è la regenza pronta d'examinar la realisabladad en il chantun Grischun. En spezial duai l'uniun "XXIV. gieus olimpics d'enviern Grischun 2022" sclerir la realisabladad a Tavau. Cun la realisaziun d'in center per il sport d'enviern pudess vegnir utilisada en moda persistenta in'ulteriura part dals stabiliments planisads fin ussa temporarmain en il rom dal project per ils gieus olimpics, ed els pudessan daventar in relasch per la giuventetgna. La situaziun in pau perifera en cumparegliaziun cun Andermatt pudess vegnir cumpensada tras la diversitad da las pussaivladads da sport. Tavau porscha ultra dal sport da naiv er ina infrastructura per il sport sin il glatsch (hockey, patinadi artistic, patinadi da sveltezza). La vischinanza da la scola da sport da "Swiss olympic" e dals centers naziunals da trenament pudess esser in ulteriur avantatg. Cuntrari a la confederaziun na vuless la regenza dal Grischun però betg sa concentrar sin in sulet lieu senza avair fatg in'evaluaziun precedenta, mabain integrar ulteriurs lieus pussaivels da realisaziun en sias ponderaziuns. Er ina cooperaziun da las vischnancas grischunas cun Andermatt al cunfin dal chantun duai vegnir examinada.
Correspundentamain è la regenza pronta d'acceptar questa incumbensa.
19 d'october 2012