En ils quints resp. en ils budgets anteriurs dal chantun suttametteva la regenza al cussegl grond mintgamai cifras detg detagliadas concernent ils custs da la scola chantunala grischuna. Quai dal tuttafatg en il senn da sias explicaziuns en la missiva al cussegl grond nr. 9/1997-1998, p. 557 ss., tenor las qualas la calculaziun da las subvenziuns a favur da las scolas medias privatas dueva vegnir rendida clera e transparenta (569). Il grad da precisaziun che vegn suttamess actualmain pertutgant ils custs da la scola chantunala grischuna en il budget ed en il quint correspunda ad autras directivas per preschentar las prestaziuns ed ils custs, na permetta al cussegl grond però betg da constatar co ch'ils custs da la scola chantunala grischuna sa preschentan effectivamain. Suenter che l'emprim sutsegnader era sa drizzà al schef da l'uffizi per la furmaziun media-superiura cun ina dumonda per e-mail fatga dacurt ed aveva supplitgà da dar ina infurmaziun en chaussa (er per evitar ulteriurs custs), e suenter che la secretaria cumpetent dal DECA l'ha alura communitgà cun la brev dals 28 da november 2012 ch'ils documents da budget detagliads stettian a disposiziun mo a la CdG e che la calculaziun dals custs vegnia duvrada a partir da l'onn 2013 mo pli sco instrument intern, èn las sutsegnadras ed ils sutsegnaders sfurzads da tschentar la suandanta dumonda parlamentara. Correspundentamain vegn la regenza supplitgada da respunder las suandantas dumondas:
1. Tge import (total resp. per scolar/a) e calculà co, scuntra l'uffizi da construcziun auta a la scola chantunala grischuna (senza convict) sut il titel custs d'utilisaziun da l'implant per l'onn 2011, per l'onn 2012 e prognostitgà per l'onn 2013?
2. Quant (total resp. per scolar/a) e calculà co, scuntra l'uffizi da persunal a la scola chantunala grischuna en connex cun l'administraziun dal persunal per l'onn 2011, per l'onn 2012 e prognostitgà per l'onn 2013?
3. Quant (total resp. per scolar/a) e calculà co, scuntra l'uffizi per la furmaziun media-superiura a la scola chantunala grischuna per prestaziuns da servetsch correspundentas per l'onn 2011, per l'onn 2012 e prognostitgà per l'onn 2013?
4. Quant (total resp. per scolar/a) e calculà co, scuntran eventualmain ulteriurs uffizis u posts da servetsch (sco per exempel l'uffizi d'informatica) a la scola chantunala grischuna per lur prestaziuns per l'onn 2011, per l'onn 2012 e prognostitgà per l'onn 2013?
Cuira, ils 4 da december 2012
Augustin, Berther (Mustér), Berther (Camischolas), Blumenthal, Bondolfi, Caluori, Casutt-Derungs, Darms-Landolt, Della Vedova, Dermont, Dosch, Fallet, Fasani, Foffa, Kollegger (Malix), Sax, Tenchio, Tomaschett (Breil), Tomaschett-Berther (Trun), Zanetti, Degonda, Müller (Susch), Müller (Haldenstein), Vincenz
Resposta da la regenza
Il subvenziunament da las scolas medias privatas vegn fatg cun agid d'ina pauschala per persuna. La calculaziun da questa pauschala per las scolas medias sa basa sin l'art. 17 da la lescha davart las scolas medias e vegn incassada cun agid d'in quint maschadà che sa cumpona sco suonda: La tariffa per persuna che vegn pajada a las scolas medias privatas per ina scolara resp. per in scolar cun dretg da survegnir subvenziuns sa basa sin las expensas da manaschi nettas ed effectivas da la scola chantunala grischuna tenor la contabilitad da las finanzas. Per quest intent vegnan ils custs per il mantegniment dals edifizis e dals stabiliments resguardads en la calculaziun nova annuala cun agid d'ina media da 5 onns. Ultra da quai vegn quintada tiers cumplementarmain ina quota d'investiziun (9 pertschient da las expensas da manaschi nettas). Las scolas medias privatas vegnan indemnisadas uschia per lur custs d'investiziun (amortisaziuns e tschains da chapital) en moda pauschala. Plinavant vegn concedida ina pauschala a favur dals custs d'administraziun da 2,5 pertschient da las expensas da manaschi nettas.
Dapi il preventiv 2010 è la scola media grischuna integrada en la gruppa da products 2 «scolas medias» da l'uffizi per la furmaziun media-superiura (UMS). Fin ussa vegniva manà en il preventiv ed en il quint dal UMS l'indicatur «custs per scolara u per scolar tenor la contabilitad da manaschi da la scola chantunala grischuna sco valur da cumparegliaziun». Questa valur è vegnida laschada davent cur ch'ins ha repassà la structura da las gruppas da products e dals effects per ils onns 2013 fin 2016 sco er cur ch'ins ha essenzialisà ils indicaturs a partir dal preventiv 2013.
La cumprova dals custs da las gruppas da products è vegnida fatga summaricamain e pia senza cumprova individuala dals differents custs calculatorics. Las infurmaziuns detagliadas tar ils custs da la scola chantunala grischuna na vegnivan er enfin ussa betg publitgadas en il preventiv ed en il quint annual. Tras las simplificaziuns ch'èn vegnidas introducidas cun il preventiv 2013, cur ch'ins ha midà la contabilitad per il MAC2, vegn la cumprova da las gruppas da products fatga da nov sin basa da la contabilitad da las finanzas. Las cifras dal quint dals custs e da las prestaziuns n'èn betg pli da vesair ni en il preventiv ni en il quint.
La contabilitad dals custs e da las prestaziuns che vegn fatga intern tras ils uffizis interdisciplinars sa basa per motivs da la praticabilitad sin tariffas fitg simplas sco er pauschalisadas ed identicas per tut ils posts da servetsch (p.ex. fr./m2 ubain en % da la summa totala dals salaris). Questas valurs pon divergiar fermamain dals custs che resultan effectivamain. Ellas na vegnan perquai er betg a furmar ina basa adattada per calcular las pauschalas da las scolas medias.
Las respostas a las singulas dumondas vegnan resumadas en la tabella qua sutvart:
22 da favrer 2013