L'armada svizra vegn sminuida. A curta u a media vista dastgass quai er avair consequenzas per il concept dals lieus da staziunament da l'armada, en spezial er en il chantun Grischun.
La furmaziun da scolaziun «Defensiun cunter aviuns 33» (DCA 33) maina a Breil ed a S-chanf plazzas da scolaziun per la DCA da tutt'aura resp. per la DCA a vista. A Breil maina la furmaziun da scolaziun DCA 33 la plazza da scolaziun per STINGER ed a S-chanf la plazza da tir per il caliber mesaun. Quests dus lieus da staziunament stattan en concurrenza cun Gluringen (VS) e cun Grandvillard (FR). Plinavant vegnan apparentamain evaluadas renovaziuns u remplazzaments da sistems da la DCA. Igl exista il privel che l'armada na dovra en l'avegnir betg pli ils dus lieus da staziunament a Breil ed a S-chanf sco lieus da scolaziun.
Sut quest aspect sa tschentan las suandantas dumondas:
1. Enconuscha la regenza ils plans che l'armada ha en l'avegnir cun ils dus lieus da staziunament numnads?
2. Sche la furmaziun da scolaziun DCA 33 na maina betg pli vinavant in u tuts dus lieus da staziunament: tge furmaziuns militaras pudessan utilisar en l'avegnir ils alloschis militars?
3. Tge tenuta ha la regenza envers in'eventuala utilisaziun betg militara da questas infrastructuras?
Cuira, ils 6 da december 2012
Hartmann (Cuira), Tomaschett (Breil), Campell, Aebli, Berther (Mustér), Bezzola (Samedan), Brandenburger, Burkhardt, Caduff, Casanova-Maron, Casutt, Cavegn, Clalüna, Conrad, Darms-Landolt, Davaz, Dermont, Engler, Fallet, Felix, Geisseler, Giacomelli, Grass, Gunzinger, Hartmann (Champfèr), Hitz-Rusch, Holzinger-Loretz, Jenny, Kasper, Komminoth-Elmer, Kunz (Fläsch), Kunz (Cuira), Marti, Michael (Castasegna), Nick, Papa, Parolini, Pfäffli, Sax, Steck-Rauch, Stiffler (Tavau Plaz), Stiffler (Cuira), Troncana-Sauer, Valär, Waidacher, Wieland, Buchli (Favugn), Patt, Rodigari
Resposta da la regenza
Il departament federal da defensiun, protecziun da la populaziun e sport (DDPS) è actualmain occupà cun il project per l'ulteriur svilup da l'armada. Per che las lavurs vi da quest project pon vegnir acceleradas, ston la confederaziun ed il parlament anc prender differentas decisiuns politicas. Senza questas decisiuns politicas na poi betg vegnir fatg in concept da staziunament adattà a las novas cundiziuns da l'armada. Senza in tal concept da staziunament na sa lascha per il mument betg far ina decleraziun lianta davart l'utilisaziun futura da las immobiglias e dals areals che tutgan al DDPS.
Las directivas da planisaziun dal cussegl federal prevesan la reducziun da la grondezza da l'armada dad actualmain var 200 000 a var 100 000 plazs da l'effectiv reglamentar tar in plafond d'expensas da 4,7 milliardas francs (inclusiv il replazzament parzial dals aviuns da cumbat "Tiger"). Ils fatgs ch'igl èn vegnids reducids d'ina vart l'effectiv reglamentar da l'armada e da l'autra vart las expensas vegnan ad avair influenza sin il nov concept da staziunament. En tge dimensiun ch'er las plazzas d'instrucziun ston vegnir reducidas tras la reducziun da l'effectiv reglamentar, na sa lascha actualmain dentant betg giuditgar exactamain.
Ils chantuns èn vegnids informads da l'armada en quel senn ch'il schef da l'armada vegn ad informar vers la fin d'avrigl da l'onn current la conferenza da las regenzas da militar, da protecziun civila e da pumpiers davart ils princips e davart ils criteris, tenor ils quals duai vegnir realisà il nov concept da staziunament.
La regenza respunda las dumondas tschentadas sco suonda:
1. A la regenza n'èn betg enconuschents ils plans da l'armada areguard la concepziun futura dals lieus da staziunament a Breil ed a S-chanf, malgrà che la regenza è s'infurmada pliras giadas ed ha declerà ses interess vi d'ina ulteriura utilisaziun militara dals lieus da staziunament.
2. Uscheditg ch'il concept da staziunament n'è betg avant maun, na po la regenza betg far decleraziuns liantas davart la concepziun futura dals lieus da staziunament a Breil ed a S-chanf. La regenza po dentant s'imaginar eventualmain che l'armada dovra quest posts en moda alternativa. Correspundentamain ha ella deposità sia tenuta en chaussa da l'armada.
3. La regenza n'è betg cunter in'autra utilisaziun da las immobiglias militaras actualas, sche l'utilisaziun previsa correspunda a las prescripziuns giuridicas (sco p.ex. l'urden da zonas). La regenza po per exempel s'imaginar che l'uffizi federal da sport (UFSPO) surpiglia ils stabiliments militars che na vegnan eventualmain betg pli duvrads.
13 da favrer 2013