Navigation

Inhaltsbereich

Sessiun: 23.04.2013
La dumonda da deputà Livio Zanetti concernent il concept chantunal per promover il sport ha la regenza respundì ils 22 d'october 2012 cun il renviament ch'ella stoppia l'emprim stgaffir cun ina lescha chantunala da sport las cundiziuns generalas necessarias avant che realisar l'incumbensa da Christian Rathgeb concernent il concept per promover il sport.

Il sport en il chantun Grischun na sa restrenscha però betg mo a la promoziun dal sport. El ha er ina impurtanza economica ed ina impurtanza creschenta per la politica da sanadad e sociala ed è perquai organisà en ina moda fitg cumplexa. Entaifer il chantun s'occupan plirs posts (uffizi per la scola populara ed il sport [USS], uffizi da sanadad) cun programs e cun projects en il sectur da la promoziun dal sport e dal moviment. La finanziaziun da stabiliments da sport è savens chaussa da las vischnancas (hallas da gimnastica, concept communal per implants da sport), entant che stabiliments da sport d'impurtanza chantunala vegnan confinanziads da l'uffizi per economia e turissem. Stabiliments privats vegnan la finala sustegnids or dal fond da sport. Per l'unic stabiliment da sport ch'il chantun posseda è percunter responsabel l'uffizi per la furmaziun media-superiura. Per il sport da prestaziun è cumpetent il USS, per sias infrastructuras pli grondas percunter l'uffizi per economia e turissem. Quel da sia vart promova occurrenzas grondas, entant che la promoziun d'occurrenzas da massa vegn finanziada da daners dal fond da sport. En quai che concerna ils temas "fairness" e prevenziun da doping è la batgetta tar l'uffizi per la scola populara ed il sport, entant che la segirezza ed il doping sco tals èn chaussa dal departament da giustia, segirezza e sanadad. Il sport sin tut ils stgalims da la scola vegn tgirà da trais differents uffizis (USS per la scola populara incl. classas da talent; uffizi per la furmaziun media-superiura per las scolas medias incl. scolas da sport; uffizi per la furmaziun professiunala). La finala stoi vegnir menziunà ch'i dat in basegn da coordinaziun cun la confederaziun (uffizi federal da sport, resp. G+S) d'ina vart e cun las vischnancas da l'autra vart.

Ina gestiun unitara ed ina coordinaziun da tut quests posts involvids premetta ina strategia generala interdepartamentala, ina concepziun a pli lunga vista concernent il svilup dal sport en il Grischun, vi da la quala pon s'orientar tant ils posts publics sco er ils partenaris da sport privats.

Ultra da quai han las discussiuns cuntraversas en connex cun la refusa da la candidatura dal Grischun per ils gieus olimpics 2022 mussà cleramain ch'i dat almain in consens en quai che pertutga l'intensivaziun da la promoziun dal sport e ch'i dat in tschert potenzial per sviluppar il sport en il chantun Grischun, ma che bleras dumondas en connex cun il sport èn anc avertas. Numnadamain manca ina coordinaziun tranter il chantun, las vischnancas e las uniuns da sport privatas sco er – en il sectur dals programs e dals projects per promover il sport ed il moviment – ina promoziun cun cleras finamiras dal sport da persunas creschidas e dal sport da scola facultativ. Er en il sectur dals stabiliments da sport manca in concept chantunal che preschenta e priorisescha il basegn da stabiliments necessaris e che na sustegna sche pussaivel ils stabiliments betg mo durant la construcziun, mabain er durant il manaschi. Ina strategia, tge occurrenzas pli grondas che vegnan prendidas en vista en l'avegnir (p.ex. campiunadis mundials nordics, campiunadi mundial da mountainbike) u tge occurrenzas che duain vegnir garantidas e tge infrastructuras che vegnan duvradas per quai manca, precis uschia sco in concept per sustegnair il sport da prestaziun, en spezial da las uniuns en quai che pertutga las cundiziuns generalas da sport. Las scolas da talent vegnan installadas actualmain, centers regiunals da prestaziun sco lur partenaris da sport percunter na vegnan betg sustegnids, centers naziunals da prestaziun percunter bain. Ulteriuras dumondas datti en quai che concerna il center da sport da naiv planisà. Potenzial è la finala er avant maun en il sectur da la scolaziun cuntinuanta (p.ex. manaschament da sport a la SATE) u en la perscrutaziun scientifica dal sport (p.ex. en connex cun l'Institut federal per la perscrutaziun da naiv e lavinas a Tavau).

Perquai ch'igl èn avertas bleras dumondas en il sectur dal sport sto – sco basa per la nova lescha da sport previsa – vegnir fatga urgentamain in'analisa specifica en ils secturs da la collavuraziun e da la coordinaziun tranter il chantun, las vischnancas e las persunas privatas, dals programs e dals projects per promover il sport ed il moviment, dals stabiliments da sport, dal sport sin tut ils stgalims da la scola, dal sport da prestaziun, da las occurrenzas da sport, da la fairness, dal doping e da la segirezza sco er da l'organisaziun e da las finanzas. La regenza ha d'elavurar las finamiras ed ina strategia generala che sa basa sin talas, adattar quellas cun la legislaziun federala actualisada e preschentar sin basa da quai ina lescha da sport.

Las deputadas ed ils deputads sutsegnads incumbenseschan perquai la regenza da far svelt in'analisa generala e d'elavurar ina strategia generala per il sport en il Grischun. Las basas legalas dal chantun Grischun ston s'orientar vi da questa strategia generala e ston correspunder a tala.

Cuira, ils 23 d'avrigl 2013

Cavegn, Jeker, Marti, Aebli, Albertin, Barandun, Berther (Mustér), Berther (Camischolas), Bezzola (Samedan), Bezzola (Zernez), Blumenthal, Brandenburger, Bucher-Brini, Buchli-Mannhart, Burkhardt, Caduff, Campell, Casanova-Maron, Casty, Casutt Renatus, Casutt-Derungs Silvia, Conrad, Darms-Landolt, Davaz, Della Vedova, Dermont, Dosch, Dudli, Engler, Fallet, Felix, Geisseler, Grass, Hardegger, Hartmann (Champfèr), Hartmann (Cuira), Hitz-Rusch, Holzinger-Loretz, Jenny, Kappeler, Kasper, Kleis-Kümin, Koch (Igis), Kollegger (Cuira), Kollegger (Malix), Komminoth-Elmer, Mani-Heldstab, Märchy-Caduff, Meyer-Grass, Michael (Donat), Michael (Castasegna), Niederer, Niggli-Mathis (Grüsch), Parolini, Parpan, Pedrini (Roveredo), Perl, Righetti, Rosa, Sax, Steck-Rauch, Stiffler (Tavau Plaz), Stiffler (Cuira), Tenchio, Tomaschett (Breil), Tomaschett-Berther (Trun), Troncana-Sauer, Tscholl, Waidacher, Wieland, Zanetti, Calonder, Camathias, Decurtins-Jermann, Deplazes, Epp, Gugelmann, Lauber, Müller (Haldenstein), Vincenz

Resposta da la regenza

I constat ch'il sport en il chantun Grischun è organisà en moda fitg cumplexa. La basa legala sa chatta en numerusas leschas, ordinaziuns e directivas. Per promover il sport ordaifer il sport da scola obligatoric è decisiva principalmain l'ordinaziun dal cussegl grond davart la promoziun da gimnastica e sport dals 21 da november 1974 (DG 470.100). Sa basond sin la lescha per promover il svilup economic en il chantun Grischun dals 11 da favrer 2004 (lescha per il svilup economic, LSE; DG 932.100) sco er sin l'ordinaziun executiva vegnan sustegnidas infrastructuras da sport ed occurrenzas per promover il svilup economic, l'attractivitad dal Grischun sco lieu economic ed il turissem.

L'october 2010 è la regenza sa declerada pronta d'acceptar l'incumbensa Rathgeb concernent il relasch d'in concept chantunal da sport. L'elavuraziun dal concept per promover il sport è cuntegnida en il program da la regenza 2013–2016 sco punct central da svilup 7/18. Correspundentamain èn er vegnidas fatgas differentas lavurs preliminaras. Cun examinar la basa per il concept chantunal per promover il sport èsi sa mussà che l'ordinaziun davart la promoziun da gimnastica e sport n'è betg pli ina basa legala suffizienta per las furmas da la promoziun moderna dal sport. Perquai ha la regenza gia punctuà en sia resposta a la dumonda Zanetti da l'october 2012 che l'emprim stoppian las cundiziuns generalas necessarias vegnir stgaffidas cun ina lescha chantunala da sport.

En il fratemp èn las lavurs vi da la nova lescha per promover il sport progredidas bain. Ella po vegnir dada en consultaziun quest atun. Igl è planisà ch'il cussegl grond la tractia durant la sessiun da zercladur 2014. La lescha per promover il sport ed in concept cumplessiv per promover il sport ed il moviment ston vegnir fatgs en moda coordinada. Igl è previs d'elavurar quest concept en moda interdepartamentala. Ils secturs numnads en l'incumbensa qua avant maun (collavuraziun tranter il chantun, las vischnancas e persunas privatas, programs e projects per promover il sport ed il moviment, implants da sport, sport da prestaziun ed occurrenzas da sport) survegnan ina impurtanza essenziala. Il concept duai preschentar la situaziun actuala, definir finamiras concretas en ils differents secturs e mussar mesiras per cuntanscher questas finamiras. Ultra da quai vali da realisar la nova lescha federala davart la promoziun dal sport e da l'activitad fisica (lescha per promover il sport).

En il rom da la consultaziun planisada tar la lescha per promover il sport pon vegnir tematisadas las dumondas davart la coordinaziun da differentas mesiras da promoziun, sco p.ex. per occurrenzas grondas e per infrastructuras. La finala stoi vegnir decidì en quest connex, en tge relasch che las mesiras correspundentas chattan eventualmain lur basa.

La regenza è pronta d'acceptar questa incumbensa en il senn da questas explicaziuns.

3 da fanadur 2013