Sin la via H19, la via d'avertura per la Surselva, è Schluein la suletta vischnanca che n'ha nagin sviament sin il traject tranter la sortida da la A13 a La Punt/Tumein fin a Glion. Tenor las datas chantunalas dal traffic sin las vias GR 2006 èn charrads l'onn 2006 en media 7'503 vehichels per di tras il vitg. Oz na vegn il traffic en Surselva betg pli registrà a Schluein, mabain mo pli en il tunnel dal Crap da Flem ed a Schnaus. Las cifras en quests lieus mussan dapi l'onn 2006 ina tendenza creschenta. Ins po pia partir dal fatg che la chargia che vegn chaschunada dal traffic è er s'augmentada en la vischnanca da Schluein. Resguardond las cifras da l'onn 2006 stoi vegnir constatà che passa 2,7 milliuns vehichels charreschan annualmain tras il vitg.
Causa il traffic vegn il vitg dividì en duas parts. Ils access dals quartiers a la via principala èn mal survesaivels, fitg privlus e dovran blera pazienza. Il lieu il pli stretg, nua che las participantas ed ils participants dal traffic sa cruschan, mesira stgars 6 m. Quest lieu sa chatta tranter las fatschadas da duas chasas. In lieu liber d'obstachels laterals manca dal tuttafatg. Per vias principalas è previs in tagl traversal regular d'in vial da 7 m ladezza senza obstachels laterals sin ina ladezza dad 1 m da mintga vart. En quest lieu stretg n'è avant maun nagin trottuar. La via da bleras abitantas e da blers abitants a la fermada da l'auto da posta amez il vitg è fitg privlusa.
Il grond traffic da transit a Schluein n'occupa betg mo las persunas creschidas che abitan a Schluein. Dacurt han las scolaras ed ils scolars da Schluein surdà a cusseglier guvernativ Mario Cavigelli lur visiuns per in sviament da Schluein. Tenor l'avis da las sutsegnadras e dals sutsegnaders èn ils giavischs da quests uffants legitims, perquai che la situaziun da segirezza è pelvaira fitg precara. Er las emissiuns da canera e da svapurs mintga di èn grevezzas supplementaras.
Il stadi actual n'è betg mo per Schluein, mabain er per l'avertura da la Surselva en general fitg nuncuntentaivel e betg acceptabel a lunga vista. Il passadi da Schluein è ina stretga privlusa che na tegna insumma betg quint dals standards generalmain auts da la construcziun da vias en il chantun areguard la favuraivladad per las utilisadras ed ils utilisaders. Il sviament da Schluein eliminass l'ultima stretga critica sin la via principala tranter Cuira e Glion.
En quest senn supplitgeschan las sutsegnadras ed ils sutsegnaders la regenza da respunder las suandantas dumondas:
1. È la regenza er da l'avis che la populaziun da Schluein è exponida ad ina periclitaziun ed ad ina chargia ordvart gronda tras il traffic da mintga di en e da la Surselva?
2. È la regenza er da l'avis che l'avertura da la Surselva è manglusa en quest traject e na correspunda betg als standards da la construcziun da vias en il chantun?
3. Sche gea, è la regenza pronta da sclerir uschè svelt sco pussaivel la realisabladad d'in sviament da Schluein e da s'engaschar per la realisaziun da quella?
Cuira, ils 11 da zercladur 2013
Casutt-Derungs Silvia, Wieland, Buchli-Mannhart (Stussavgia Plaz), Albertin, Berther (Camischolas), Blumenthal, Bondolfi, Brandenburger, Bucher-Brini, Caduff, Caluori, Campell, Casanova-Maron, Casty, Casutt Renatus, Cavegn, Darms-Landolt, Della Vedova, Dermont, Dosch, Fasani, Felix, Gartmann-Albin, Geisseler, Giacomelli, Gunzinger, Hardegger, Joos, Kappeler, Kleis-Kümin, Koch (Tumein), Kollegger (Malix), Lorez-Meuli, Märchy-Caduff, Meyer-Grass, Michael (Donat), Montalta, Niederer, Niggli-Mathis (Grüsch), Noi-Togni, Papa, Parolini, Parpan, Pedrini, Peyer, Pult, Righetti, Sax, Tenchio, Thöny, Tomaschett (Breil), Tomaschett-Berther (Trun), Vetsch (Claustra Vitg), Vetsch (Pragg-Jenaz), Zanetti, Berther (Segnas), Buchli (Favugn), Bürgi-Büchel, Degonda, Hauser, Hensel, Preisig
Resposta da la regenza
La chargia che vegn chaschunada dal traffic sin la via sursilvana tranter Tumein e Glion è considerabla. Mo sin paucs trajects parzials pli curts da la rait da las vias chantunalas dal Grischun circulescha dapli u circa tuttina bler traffic. Correspundentamain èn vegnids realisads successivamain sviaments per ils vitgs da quest access en la Surselva. Effectivamain è Schluein oz l'ultima stretga existenta da quest traject. Il traject entaifer il vitg è bain relativamain curt, las cundiziuns generalas èn dentant fitg cumplexas pervia da la posiziun e dal tip dals edifizis existents, pervia da l'aual e pervia da las sbuccadas da differentas vias communalas e da la via da colliaziun chantunala per Sagogn. En mintga cas è la situaziun actuala cun la divisiun dal vitg tras la via chantunala fitg nuncuntentaivla areguard la segirezza per la populaziun e per il traffic sco er areguard la qualitad da viver en il vitg.
Tar las dumondas concretas:
1. La regenza è er da l'avis che la situaziun da traffic è fitg engrevgianta e privlusa per la populaziun da Schluein.
2. Passadis stretgs en vitgs datti ozendi anc adina en differents lieus sin la rait da vias principalas chantunalas. Da princip na correspundan tut questas stretgas e tut quests lieus privlus betg als basegns actuals da la societad concernent la segirezza e la quietezza d'ina vart e concernent l'utilisaziun da las vias senza obstachels da l'autra vart. Quai vala er per il passadi actual en la vischnanca da Schluein.
3. Sco projects pli gronds vegnan actualmain realisads il sviament da Silvaplauna ed il sviament dal passadi da viafier a Glion. Tenor il program da construcziun da vias 2013 – 2016 è ultra da quai previsa l'elavuraziun da projects d'exposiziun per sviaments da singuls vitgs giuditgads sco prioritars. In sviament da Schluein n'è betg inclus.
Pervia dal svilup il pli actual da la situaziun da traffic entaifer il vitg da Schluein è la regenza pronta da far ils scleriments giavischads areguard la realisabladad d'in sviament en il rom dal program da construcziun da vias current resp. da realisar in studi da variantas correspundent. Davart l'elavuraziun d'in project d'exposiziun e davart in'eventuala realisaziun da quel na po la regenza dentant betg s'exprimer per il mument.
15 d'avust 2013