Cuntegn da la pagina

Incumbensa da la fracziun da la PS concernent la promoziun da sanaziuns energeticas da manaschis d'hotellaria

sessiun: 30.08.2013
Perquai che l'iniziativa cunter las abitaziuns secundaras è vegnida acceptada ils 11 da mars 2012 èn sa midadas las cundiziuns generalas per il turissem. Empè da sin ulteriuras abitaziuns secundaras sto il focus vegnir bittà da nov sin il rinforz da l'hotellaria. Ma l'hotellaria cumbatta pervia da la situaziun conjuncturala en Europa e pervia dal ferm franc svizzer cun problems da la cumpetitivitad. Perquai dovri mesiras per sbassar ils custs da producziun e per meglierar la purschida. Optimaziuns essenzialas pon vegnir cuntanschidas cun ina modernisaziun rinforzada e cun ina sanaziun energetica. Quai na vegn strusch a gartegiar senza in sustegn finanzial pli grond dal maun public.

Las sutsegnadras ed ils sutsegnaders incumbenseschan la regenza da definir e da preschentar al cussegl grond mesiras per promover spezialmain sanaziuns energeticas da manaschis d'hotellaria.

Cuira, ils 30 d'avust 2013

Thöny, Baselgia-Brunner, Frigg-Walt, Gartmann-Albin, Jaag, Locher Benguerel, Müller (Tavau Plaz), Noi-Togni, Peyer, Pfenninger, Pult, Trepp, Deplazes, Hensel, Monigatti

Resposta da la regenza

L'incumbensa da la fracziun da la PS pretenda ina promoziun speziala a favur da sanaziuns energeticas dals manaschis d'hotellaria. Cun questas mesiras duain vegnir reducids ils custs da producziun e duai vegnir meglierada la purschida. Motivada vegn questa pretensiun cun las cundiziuns generalas ch'èn sa midadas per il turissem, pervia da l'acceptaziun da l'iniziativa cunter las abitaziuns secundaras e cun ils problems da l'hotellaria en la concurrenza, pervia da la situaziun conjuncturala da l'Europa e pervia dal franc ferm.

Da princip stoi vegnir constatà che gia oz existan pussaivladads da promoziun cumplessivas sin fundament da la lescha d'energia dal chantun Grischun. Particularmain vegnan promovidas sanaziuns parzialas e totalas dals mirs exteriurs d'in edifizi, dals indrizs da la tecnica da chasa per utilisar las energias regenerablas (stgaudaments da laina, indrizs da pumpa a chalur, indrizs solars, boilers da pumpa a chalur, corporaziuns da chalur, indrizs da ventilaziun da confort) e las meglieraziuns dal grad d'utilisaziun en process industrials (p.ex. substituziun da plattas, d'indrizs da frestgentar, d'indrizs per reciclar la chalur da ventilaziuns). Da quai profitan cunzunt er ils manaschis d'hotellaria en il chantun Grischun.

Las contribuziuns chantunalas èn oz generalmain adequatas. Las contribuziuns correspundan a circa 15 % dals custs d'investiziun (p.ex. la substituziun d'ina platta veglia d'in manaschi d'hotellaria tras ina platta d'inducziun da la generaziun la pli nova: Il consum d'energia ed ils custs d'energia sa reduceschan per circa 30 % e vi dals custs d'investiziun da circa 30 000 francs paja il chantun Grischun ina contribuziun da promoziun da var 4 000 francs). Ils programs da promoziun dattan in impuls per far sanaziuns energeticas resp. renovaziuns e gidan sco effect secundar positiv ad augmentar la rentabilitad dals manaschis d'hotellaria. Per dumagnar meglier las sfidas fundamentalas da l'hotellaria sco part da la branscha turistica dal Grischun na pon las contribuziuns da promoziun a sanaziuns energeticas percunter betg propi gidar. Per quest intent n'èn las contribuziuns da promoziun betg adattadas, perquai ch'ellas dependan da l'intent e perquai ch'ellas han in import memia pitschen.

Sche l'incumbensa da fracziun vegniss chapida en quel senn ch'i na sto betg en emprima lingia vegnir prendida en egl in'amplificaziun da las pussaivladads da promoziun, mabain in sustegn finanzial pli ferm a favur da l'hotellaria, cuntrafaschess ina tala pretensiun al princip dal tractament egual e chaschunass problems da cunfinaziun considerabels. En spezial la cunfinaziun envers la parahotellaria ed envers ils hotels d'appartaments fiss pussaivla en la pratica mo cun lavur e custs sproporziunads. Gist en quests cas stuess il princip dal tractament egual vegnir considerà cun in quità tut spezial. Ultra da quai pretendess l'augment da las tariffas da promoziun a favur da l'hotellaria ch'il cussegl grond mettess a disposiziun ulteriurs meds finanzials. En vista a la situaziun actuala da las finanzas chantunalas ed en vista a las prescripziuns da la politica da finanzas dal cussegl grond n'è in tal augment betg imaginabel.

Per ils motivs menziunads refusa la regenza l'incumbensa da fracziun. Gia oz existan pussaivladads da promoziun cumplessivas a favur da sanaziuns energeticas, da las qualas profita particularmain er l'hotellaria.

14 d’october 2013