Dumonda Pfenninger concernent la metoda participativa tar revitalisaziuns e mesiras architectonicas (midadas abruptas da la deflussiun) en connex cun la realisaziun da la lescha davart la protecziun da las auas
Sessiun: 05.12.2013
Las explicaziuns da la regenza sin l'incumbensa Darms-Landolt (sessiun d'avrigl 2013) sco er las respostas en l'ura da dumondas da la sessiun da december 2013 (Monika Lorez-Meuli) mussan che las dumondas che pertutgan las mesiras ed ils pass da planisaziun en connex cun la realisaziun da la lescha federala davart la protecziun da las auas (revitalisaziuns e.u.v.) èn fitg brisantas. Il stadi d'infurmaziun flaivel da la populaziun, ma er da las autoritads regiunalas e communals, sco er la mancanza da savida davart ils pass da planisaziun cumplexs laschan nascher pregiudizis e sveglian temas en las regiuns e valladas ch'en eventualmain pertutgadas.
Perquai supplitgain nus la regenza da respunder las suandantas dumondas:
1. È la regenza pronta d'examinar – ultra da las proceduras da consultaziun usitadas tar vischnancas e federaziuns – er ina vasta furma da participaziun da la populaziun e da las differentas gruppas d'interess?
2. Èsi imaginabel da lavurar cun in proceder analogamain a la participaziun tar il concept da spazi dal Grischun?
3. Po la regenza s'imaginar d'agir en moda proactiva cun in'offensiva d'infurmaziun a temp inclusiv occurrenzas d'infurmaziun regiunalas e localas e sche gea, cura pudessi vegnir fatg quint cun emprimas activitads en quest connex?
4. Cun tge conflicts da dretg e d'utilisaziun stuessi vegnir fatg quint – tenor il stadi da savida actual – en connex cun la realisaziun da revitalisaziuns e da regulaziuns concernent las midadas abruptas da la deflussiun?
5. Po la regenza preschentar in urari approximativ per ils differents pass da planisaziun e las pussaivladads da prender influenza?
6. Cura ed en tge territoris stoi vegnir fatg quint cun in'emprima etappa da realisaziun da mesiras architectonicas?
Cuira, ils 5 da december 2013
Pfenninger, Deplazes, Baselgia-Brunner, Frigg-Walt, Gartmann-Albin, Jaag, Kappeler, Locher Benguerel, Müller (Tavau Plaz), Noi-Togni, Peyer, Pult, Thöny, Trepp, Hensel, Monigatti
Resposta da la regenza
Cun la midada da la lescha federala dals 24 da schaner 1991 davart la protecziun da las auas (Lescha davart la protecziun da las auas, LPAuas; CS 814.20) ch'è vegnida messa en vigur il 1. da schaner 2011 èn vegnidas stgaffidas incumbensas supplementaras ch'ils chantuns ston realisar. Ils termins èn fixads en moda fitg ambiziusa e muntan ina gronda sfida particularmain per ils chantuns alpins. Cun il conclus nr. 467 dals 17 da matg 2011 ha la regenza mess a disposiziun las resursas necessarias ed installà ina cumissiun d'accumpagnament externa, da la quala fan part las ovras electricas, l'agricultura sco er las federaziuns per la protecziun da l'ambient e da pestgadras e pestgaders. Pervia da las differentas incumbensas e cumpetenzas sco er pervia dal different basegn da spazi ston las dumondas da l'intervenziun vegnir respundidas separadamain tenor las incumbensas.
En la planisaziun strategica da revitalisaziun vegnan designads ils trajects da las auas che vegnan – sin basa d'analisas objectivas e pervia da criteris professiunals – en emprima lingia en dumonda per revitalisaziuns.
Il plan da mesiras consolidà per sanar ils donns che vegnan chaschunads da las midadas abruptas da la deflussiun, la mobilitad dals peschs sco er la bilantscha da gera sto mussar en tge auas ch'i dat tals donns e cun tge mesiras ch'i pon vegnir cuntanschids tge effects.
1. Anc avant las vacanzas da stad 2014 vegn lantschada ina consultaziun davart la planisaziun strategica da revitalisaziun ed il medem mument davart la determinaziun dal spazi d'auas per lung da las grondas auas en il fund da las vals. En quest connex duain las vischnancas pudair annunziar lur eventuals projects concernent la planisaziun da revitalisaziun. Las parts pertutgadas directamain, ma er la populaziun en general pon preschentar lur giavischs en spezial a chaschun d'in project da revitalisaziun concret, a chaschun da la determinaziun dal spazi d'auas en la planisaziun d'utilisaziun u a chaschun da'l process da permissiun per mesiras architectonicas cunter las midadas abruptas da la deflussiun.
2. Il circul da las parts pertutgadas sco er la libertad da furmaziun èn differents tut tenor l'incumbensa da la protecziun da las auas e mintgamai pli pitschens che tar la dumonda dal concept da spazi. In process da participaziun concepì en moda extendida è pauc raschunaivel en la fasa actuala da las incumbensas da la protecziun da las auas e n'è er betg realisabel pervia da las cundiziuns generalas areguard il temp.
3. L'integraziun da las parts pertutgadas directamain resp. da la populaziun en general sto vegnir fatga en il rom da proceduras etablidas, e quai mintgamai, cur ch'ils projects èn elavurads en moda detagliada avunda, uschia che l'esser pertutgà ed ils conflicts èn perceptibels.
4. En cas da projects da revitalisaziun poi dar conflicts d'utilisaziun, per exempel en ils secturs da l'agricultura, da la protecziun cunter auas grondas, da la tschiffada d'aua da baiver en l'aua sutterrana, da vias da traffic, dal guaud, da zonas da construcziun e da l'explotaziun da gera. Quels dependan mintgamai fermamain dal project concret. Tar mesiras architectonicas che vegnan prendidas per eliminar las consequenzas da las midadas abruptas da la deflussiun da l'aua pon per exempel la protecziun da la cuntrada, la protecziun dals biotops u la quantitad d'aua restanta tar ovras electricas che retiran lur aua dals flums chaschunar ulteriurs conflicts.
5. L'urari resulta directamain dals termins fixads en la lescha federala davart la protecziun da las auas. Ils conflicts ston vegnir rectifitgads entaifer las proceduras da planisaziun e da permissiun etablidas: Fin la fin da l'onn 2014 sto vegnir preschentada a la confederaziun ina planisaziun strategica da revitalisaziun che sto vegnir actualisada mintga 12 onns e che vegn a servir a la confederaziun sco basa per priorisar las contribuziuns federalas. La determinaziun dals spazis d'auas sto esser fatga fin l'onn 2018. La fin da l'onn 2014 ston vegnir surdads a la confederaziun ils plans da mesiras per sanar ils donns che derivan da las ovras electricas e che cumpiglian las midadas abruptas da la deflussiun da l'aua, la mobilitad dals peschs sco er la bilantscha da gera. L'uffizi per la natira e l'ambient ha l'intenziun da cuntinuar cun l'elavuraziun concreta da las mesiras sche pussaivel en in process participativ.
6. Pervia da la suveranitad en dumondas da las auas ston projects da revitalisaziun vegnir inizialisads en mintga cas da la vischnanca. Las mesiras per sanar ils donns che derivan da las midadas abruptas da la deflussiun da l'aua ston vegnir realisadas da las societads d'ovras electricas fin il pli tard l'onn 2030 e sa drizzan tenor la planisaziun da quellas, tenor la factibilitad, la realisabladad e la commensurabladad d'ina mesira e tenor ils meds finanzials federals che stattan a disposiziun per las sanaziuns.
27 da favrer 2014