Navigation

Inhaltsbereich

Sessiun: 24.04.2014
La tematica da la tgira dals confamigliars n'ha per il solit betg la valur ch'ella meritass sin basa da ponderaziuns socialas, famigliaras ed economicas. La tgira da confamigliars a chasa vegn considerada sco act voluntar. Ella distgargia dentant considerablamain las assicuranzas socialas e las assicuranzas da malsauns. Cun la finamira da vulair sustegnair l'agid als confamigliars vegn la regenza supplitgada da respunder las suandantas dumondas:

1. Cun tge instruments ed en tge dimensiun sustegna il dretg grischun l'agid als confamigliars?

2. Vesa la regenza – en il sectur fiscal – pussaivladads da deducziuns supplementaras resp. liberaziuns da taglia per indemnisaziuns d'assistenza voluntaras?

3. Quant auts stima la regenza ils respargns che resultan per la societad en il rom da las assicuranzas socialas e dals fatgs da sanadad tras l'agid als confamigliars?

Cuira, ils 24 d'avrigl 2014

Caduff, Albertin, Augustin, Berther (Mustér), Berther (Camischolas), Blumenthal, Bondolfi, Bucher-Brini, Casutt-Derungs Silvia, Cavegn, Darms-Landolt, Dermont, Dosch, Fallet, Fasani, Florin-Caluori, Frigg-Walt, Gartmann-Albin, Kleis-Kümin, Kollegger (Malix), Märchy-Caduff, Niederer, Noi-Togni, Pfenninger, Pult, Sax, Tenchio, Thöny, Tomaschett (Breil), Trepp, Zanetti, Berther (Segnas)

Resposta da la regenza

Stimaziuns partan dal fatg che la quota da las persunas che basegnan tgira, che abitan a chasa e che han passa 65 onns importa ca. 60 pertschient. Ils ulteriurs var 40 pertschient abitan en chasas da dimora. Las persunas che basegnan tgira e che abitan a chasa vegnan tgiradas ed assistidas per gronda part da confamigliaras e da confamigliars sco er da la spitex. Da las datas da l'enquista svizra davart la sanadad resulta che prestaziuns da la spitex vegnan savens purschidas en cumbinaziun cun l'agid da las confamigliaras e dals confamigliars. Quest agid da las confamigliaras e dals confamigliars e la tgira professiunala sa cumpletteschan pia.

La regenza è da l'avis ch'i saja da princip chaussa da las persunas che basegnan tgira d'indemnisar la persuna che tgira respectivamain che assista. Sch'ina persuna che basegna tgira na po – pervia d'ina situaziun finanziala d'urgenza – betg indemnisar las prestaziuns da tgira che vegnan purschidas a sia favur, duai questa persuna dentant survegnir il sustegn dal stadi.

Sin plaun federal prevesan l'assicuranza per vegls e survivents (AVS) e l'assicuranza d'invaliditad (AI) bunificaziuns da tgira per persunas che assistan, en la medema chasada, parentas e parents che basegnan tgira. Las bunificaziuns da tgira n'èn betg prestaziuns finanzialas directas. Ellas vegnan messas a quint tar la calculaziun da las rentas da las confamigliaras e dals confamigliars che tgiran. Quai èn pia supplements tar l'entrada da gudogn che furma las rentas; a las confamigliaras ed als confamigliars che tgiran pussibiliteschan els da cuntanscher ina renta pli gronda, ina giada ch'ellas ed els èn sezs en la vegliadetgna da renta.

En il rom da las prestaziuns supplementaras (PS) tar la AVS e tar la AI vegnan indemnisads a las persunas che han in dretg sin PS ils custs che resultan per l'agid, per la tgira e per l'assistenza a chasa, e quai fin ad in import maximal ch'è vegnì fixà da la confederaziun. Sco custs correspundents vegn renconuschida er l'indemnisaziun per la tgira e per l'assistenza a favur da confamigliaras e da confamigliars. La premissa è che las confamigliaras ed ils confamigliars hajan da supportar – tras la tgira e tras l'assistenza – ina perdita da gudogn considerabla che dura pli ditg.

La regenza respunda las dumondas tschentadas sco suonda:

1. Tenor l'ordinaziun tar la lescha per promover la tgira da persunas malsaunas han las organisaziuns da la spitex la pussaivladad d'engaschar sut tschertas cundiziuns confamigliaras e confamigliars che tgiran e d'indemnisar questas persunas en il rom dal preventiv da temp ch'è fixà en l'incarica generala chantunala da prestaziuns.

2. En il dretg fiscal federal armonisà èn tut las entradas suttamessas a la taglia sin las entradas. Libras da taglias èn mo las entradas che figureschan en l'art. 7 al. 4 da la lescha federala davart l'armonisaziun da la taglia directa dals chantuns e da las vischnancas (CS 642.34). Il chantun na po fixar naginas autras excepziuns. Sche las indemnisaziuns d'assistenza na vegnissan betg suttamessas a la taglia, cuntrafaschess quai al dretg federal.

L'introducziun d'ina deducziun sociala per indemnisaziuns d'assistenza voluntaras vegn refusada da la regenza. Ina deducziun sociala po vegnir concedida là, nua ch'igl exista ina capacitad economica reducida en las relaziuns da vita sin basa d'ina constellaziun particulara, sche questa capacitad economica reducida na vegn betg gia resguardada en il dretg fiscal. Tar la tgira gratuita da confamigliaras e da confamigliars n'è quai betg il cas, perquai ch'i resulta gia ina taglia pli bassa sin las entradas, cunquai che tschertas entradas na vegnan betg realisadas. Ina deducziun supplementara na resguardass betg la capacitad economica, mabain onurass in cumportament giavischaivel en il senn d'ina taxa directiva. La regenza è dentant adina stada da l'avis ch'il dretg fiscal na saja betg adattà per cuntanscher finamiras directivas extrafiscalas. Tras talas daventa il dretg fiscal pli cumplitgà e pli malgist, ellas sfalsifitgeschan la basa da calculaziun da l'entrada suttamessa a la taglia che vegn duvrada sco referenza er en auters secturs, ellas n'èn suttamessas a naginas controllas dal preventiv e dals custs e nagin na controllescha lur efficacitad. Vitiers vegn en il cas qua avant maun la gronda lavur administrativa che resultass tras la controlla d'ina tala deducziun.

3. Perquai che las datas necessarias respectivas n'èn betg avant maun, n'èsi betg pussaivel da stimar ils respargns che resultan per la societad en il rom da las assicuranzas socialas e dals fatgs da sanadad tras l'agid a las confamigliaras ed als confamigliars.

5 da zercladur 2014