Zum Seiteninhalt

Incumbensa da la cumissiun per furmaziun e cultura concernent in concept dad ICT per la scola populara dal chantun Grischun

sessiun: 21.10.2014
Il diever da medias modernas sa chapescha oz da sez en mintga sectur da la vita. I na dat strusch pli plazzas da lavur che na premettan betg enconuschientschas da las ICT (tecnologias d'infurmaziun e da communicaziun). Cuntrari ad auters chantuns da la Svizra orientala n'ha noss chantun fin oz nagin concept per la scola populara che descriva, co che las medias modernas duain vegnir applitgadas en l'instrucziun. Tenor l'art. 2 al. 4 da la lescha da scola "s'acquistan e sviluppan tut las scolaras e tut ils scolars enconuschientschas e cumpetenzas fundamentalas che permettan ad ellas ed ad els d'emprender durant lur entira vita e da chattar lur plazza en la societad ed en la vita professiunala".

Cunquai che prescripziuns chantunalas mancan, han diversas instituziuns responsablas per la scola sviluppà ils ultims onns agens concepts cun agid d'interpresas da cussegliaziun privatas, ed ellas applitgeschan las medias modernas tenor agen parairi. Quai ha per consequenza che las enconuschientschas da las scolaras e dals scolars en il chantun èn fitg differentas. Per las instituziuns responsablas per la scola resultan plinavant gronds custs che pudessan vegnir spargnads tras in proceder coordinà.

En vista a la mancanza da persunal spezialisà en las professiuns tecnicas fan la confederaziun e numerus chantuns gronds sforzs per rinforzar ils roms MINT (matematica, informatica, scienzas natiralas e tecnica). Quest rinforz duess cumenzar er tar nus gia en la scola populara, sco previs en il Plan d'instrucziun 21.

Per tegnair quint da la gronda impurtanza da las ICT per nossas scolaras e noss scolars e per mantegnair l'egualitad da las schanzas en la cumparegliaziun entaifer ed ordaifer il chantun incumbenseschan las sutsegnadras ed ils sutsegnaders la regenza d'elavurar in concept dad ICT per la scola populara dal chantun Grischun, resguardond las prescripziuns dal Plan d'instrucziun 21. Il concept duai cumpigliar ils suandants secturs:

1. Cuntegns
- Finamiras e cuntegns da l'instrucziun dad ICT per la scola populara grischuna;
- scolaziun e furmaziun supplementara da las persunas d'instrucziun;
- standards minimals areguard l'equipament da basa da las scolas incl. preschentaziun dals custs presumtivs.

2. Cussegliaziun
- Installaziun d'in post da cussegliaziun per las scolas en dumondas pedagogicas, didacticas, organisatoricas e tecnicas en connex cun la realisaziun dal concept chantunal dad ICT.

3. Cooperaziun
- Il concept duai vegnir elavurà en cooperaziun cun la scola auta da pedagogia dal Grischun (SAPGR), cun l'associaziun dals cussegls da scola dal Grischun (ACSG), cun la federaziun da mainascolas dal Grischun (FMSGR) e cun la Magistraglia Grischun (LEGR).

4. Plan d'implementaziun
- I duai vegnir preschentà, entaifer tge termins ch'il concept dad ICT vegn implementà.

Il concept duai vegnir prendì per mauns immediatamain suenter che la part dad ICT dal Plan d'instrucziun 21 è vegnida deliberada als chantuns e duai lura star a disposiziun entaifer in onn.

Cuira, ils 21 d'october 2014

Tenchio, Locher Benguerel, Thomann-Frank, Atanes, Berther, Casty, Clalüna, Hug, Kasper, Märchy-Caduff, Waidacher

Resposta da la regenza

Las tecnologias d'infurmaziun e da communicaziun (ICT) daventan adina pli e pli impurtantas per nossa societad. Per che las scolaras ed ils scolars possian dumagnar cun success questas novas sfidas, è vegnì sviluppà per il Plan d'instrucziun 21 in plan d'instrucziun a moduls "Medias ed informatica". Ils cuntegns vegnan intermediads d'ina vart en structuras da temp spezialmain cumprovadas durant l'instrucziun cursorica e da l'autra vart er en auters secturs spezials, principalmain en "tudestg", "furmar" e "natira, uman, societad" (cumpetenzas d'applicaziun). Il Plan d'instrucziun 21 menziunescha pia las finamiras ed ils cuntegns che duain vegnir cuntanschids en il sectur "medias ed informatica".

Ensemen cun auters plans d'instrucziun a moduls e cun plans d'instrucziun spezials vegn il plan d'instrucziun a moduls "Medias ed informatica" examinà ils proxims mais en il rom da l'introducziun futura dal Plan d'instrucziun 21 e sche necessari adattà als basegns chantunals. A medem temp vegn il departament d'educaziun, cultura e protecziun da l'ambient a far in rapport per mauns da la regenza, suenter ch'il Plan d'instrucziun 21 era vegnì deliberà la fin d'october als chantuns. En quest rapport vegnan preschentadas las novaziuns las pli impurtantas en connex cun il Plan d'instrucziun 21 per il chantun (cf. respostas a las incumbensas Florin-Caluori, conclus nr. 964 dals 15 d'october 2013, resp. Toutsch, conclus nr. 957 dals 20 d'october 2014). Il rapport vegn a mussar, tge basegn da furmaziun supplementara ch'è avant maun tar las persunas d'instrucziun, ed en spezial er a tematisar las qualificaziuns posteriuras necessarias per il nov sectur spezial "medias ed informatica".

Il rapport, las novas tavlas da lecziuns e las parts dal plan d'instrucziun che vegnan eventualmain adattadas per il Grischun èn cumponentas dal conclus da la regenza davart il Plan d'instrucziun 21. Dus elements centrals dal concept dad ICT che vegn pretendì tras l'incumbensa da la cumissiun – numnadamain finamiras e cuntegns da l'instrucziun dad ICT sco er scleriments davart il basegn da furmaziun supplementara respectiv tar las persunas d'instrucziun – èn pia elements dal rapport planisà resp. dal conclus da la regenza e na pon perquai betg vegnir tractads independentamain da tals u pli baud che tals. Il plan d'instrucziun a moduls "Medias ed informatica" daventa liant per las scolas pir cur ch'il Plan d'instrucziun 21 vegn mess en vigur. Per l'ulteriura realisaziun dal Plan d'instrucziun 21 vegnan sche necessari concedids termins generus.

En connex cun l'introducziun dal Plan d'instrucziun 21 vegn la regenza a laschar elavurar agids per las instituziuns responsablas per la scola. Quels cuntegnan standards minimals concernent l'equipament da basa tecnic da las scolas per l'instrucziun dad ICT, inclusiv infurmaziuns davart ils custs che resultan previsiblamain en chaussa. La scola auta da pedagogia dal Grischun, l'associaziun dals cussegls da scola dal Grischun, la federaziun da mainascolas dal Grischun e la Magistraglia Grischun vegnan involvidas en chaussa en moda adequata. Sch'i vegniss creà in post da cussegliaziun dad ICT per las scolas, pudess quai dentant svegliar pretensiuns en secturs cun problematicas d'ina cumplexitad sumeglianta che n'avevan fin ussa er betg in post da cussegliaziun (p.ex. prevenziun da sanadad e da violenza, renovaziun da chasas da scola e.u.v.). Per motivs persunals e finanzials duai perquai vegnir desistì da crear in post da cussegliaziun separà. Las occurrenzas da furmaziun supplementara ed ils agids per las instituziuns responsablas per la scola permettan da resguardar suffizientamain las dumondas che sa tschentan cun realisar il plan d'instrucziun a moduls "Medias ed informatica". En cas da basegn poi plinavant vegnir tratg en consideraziun d'engaschar en la fasa da realisaziun ina gruppa accumpagnanta, sco quai ch'i vegn p.ex. pratitgà cun success en l'instrucziun da linguas estras tar l'introducziun da novs meds d'instrucziun.

La regenza è pronta d'acceptar l'incumbensa en il senn da las consideraziuns qua survart.

11 da december 2014