Cuntegn da la pagina

Incumbensa Kappeler concernent l'electromobilitad en il Grischun

sessiun: 21.10.2014
Gia pli ditg èsi incontestà che l'electromobilitad po gidar en moda relevanta a meglierar l'effizienza energetica ed a reducir las emissiuns da CO2 (cussegl federal, 22-08-2012). Per quest motiv han il deputà Joos ed ils consutsegnaders inoltrà ina incumbensa concernent "schanzas da l'electromobilitad en il Grischun", la quala il cussegl grond ha acceptà en il senn da la regenza. Concretamain vul quai dir che la regenza è pronta – en coordinaziun cun las activitads sin plaun federal – d'examinar las schanzas da l'electromobilitad per il chantun Grischun.

Ils ultims mais èn las ovras idraulicas grischunas sa lamentadas che la rentabilitad da lur implants saja sa reducida. En ses rapport "Economia d'electricitad dal Grischun – trends 2014" dal matg 2014 ha il Forum economic dal Grischun analisà la situaziun ed ha preschentà opziuns d'agir. La cumpetenza da decisiun directa dal chantun Grischun cumpiglia en quest reguard praticamain mo la promoziun da l'electromobilitad.

Las sutsegnadras ed ils sutsegnaders incumbenseschan perquai la regenza da betg mo examinar las schanzas da l'electromobilitad tenor l'incumbensa Joos, mabain er da s'engaschar activamain per la promoziun da l'electromobilitad. Quai cun prender en emprima lingia las suandantas mesiras:

- utilisar pli savens vehichels electrics, cur che l'administraziun chantunala resp. ses uffizis remplazzan u cumpran vehichels;

- sustegnair activitads che han la finamira d'endrizzar infrastructuras per chargiar vehichels electrics.

Cuira, ils 21 d'october 2014

Kappeler, Joos, Heiz, Albertin, Atanes, Baselgia-Brunner, Berther, Bondolfi, Bucher-Brini, Buchli-Mannhart, Burkhardt, Cahenzli-Philipp, Caluori, Casanova (Glion), Cavegn, Caviezel (Cuira), Crameri, Darms-Landolt, Degonda, Deplazes, Engler, Epp, Foffa, Hardegger, Jenny, Kunfermann, Lorez-Meuli, Monigatti, Noi-Togni, Papa, Pedrini, Perl, Peyer, Pfenninger, Pult, Salis, Stiffler (Cuira), Thöny, Tomaschett (Breil), Tomaschett-Berther (Trun), Vetsch (Pragg-Jenaz), von Ballmoos, Weber, Widmer-Spreiter, Sgier

Resposta da la regenza

L'incumbensa Kappeler sa referescha a l'incumbensa Joos concernent "schanzas da l'electromobilitad en il Grischun" ch'è vegnida acceptada dal cussegl grond en la sessiun da zercladur 2014 en il senn da la regenza (cf. PCG 2013/2014, 334; PCG 2013/2014, 846 s. e 1036). Cun l'incumbensa Joos è la regenza vegnida incaricada da sclerir las schanzas che pudessan resultar tras il diever e tras la promoziun da l'electromobilitad en il chantun Grischun. Sco cumplettaziun da quai pretenda ussa l'incumbensa Kappeler che la regenza s'engaschia activamain per la promoziun da l'electromobilitad. Ella duai far quai cun procurar ch'i vegnian utilisads pli savens vehichels electrics tar l'administraziun chantunala, ma er cun sustegnair activitads che han la finamira d'endrizzar infrastructuras per chargiar vehichels electrics.

L'uffizi d'energia e da traffic elavura actualmain in rapport davart l'electromobilitad en il chantun Grischun. Quest rapport duai tranter auter descriver ils svilups futurs dals vehichels electrics en il chantun, las schanzas e las ristgas sco er las activitads e las pussaivladads d'agir dal chantun, da las vischnancas e dals provediders d'energia.

Sin basa dal rapport menziunà è la regenza pronta d'examinar pli profundamain, co che vehichels electrics pon vegnir duvrads pli savens tar l'administraziun chantunala e co che infrastructuras a favur da l'electromobilitad pon vegnir promovidas activamain. En quest senn propona la regenza d'acceptar l'incumbensa.

4 da december 2014