Navigaziun principala

Cuntegn da la pagina

Incumbensa Crameri concernent la simplificaziun e l'acceleraziun da la procedura per la permissiun da construcziun

Sessiun: 09.12.2015

Il princip d'acceleraziun resulta – en spezial er en la procedura administrativa – da l'art. 29 al. 1 da la constituziun federala (Cst.; CS 101). Dapi il 1. da matg 2014 èn en vigur la revisiun parziala da la lescha davart la planisaziun dal territori (LPT; CS 700) sco er la revisiun parziala da l'ordinaziun davart la planisaziun dal territori (OPT; CS 700.1)(LPT 1). En il rom da la realisaziun da LPT 1 vegnan ils chantuns a stuair far adattaziuns en las legislaziuns chantunalas. 10 onns suenter l'entrada en vigur da la lescha davart la planisaziun dal territori per il chantun Grischun (LPTGR; DG 801.100) e da l'ordinaziun davart la planisaziun dal territori per il chantun Grischun (OPTGR; DG 801.110) duai vegnir fatga – en il rom da questas adattaziuns – in'analisa cumplessiva, co che las proceduras per la permissiun da construcziun e las proceduras EOZ pon vegnir acceleradas e simplifitgadas. Da resguardar èn ils suandants giavischs da revisiun:

 

- Ils termins legals ed ils termins da liquidaziun – en spezial ils termins d'exposiziun e da protesta (art. 45 OPTGR), la communicaziun da decisiuns da construcziun e da projects da construcziun che suttastattan ad ina EE (art. 46 al. 3 OPTGR) e las decisiuns EOZ (art. 49 al. 2 OPTGR) – ston, uschenavant ch'igl è raschunaivel, vegnir scursanids. Per exempel enconuschan auters chantuns termins d'exposiziun e da protesta pli curts.

 

- In'acceleraziun da la procedura en connex cun il dretg da recurs da las organisaziuns per la protecziun da l'ambient sto vegnir prendida en mira. Uschia duai vegnir examinada lur participaziun a proceduras, ed ellas duain p. ex. pudair sa participar a proceduras EOZ pir suenter ch'ils uffizis han prendì posiziun en chaussa (art. 104 LPTGR).

 

- En cas da projects da construcziun che dovran ina permissiun supplementara sto vegnir cuntanschida in'acceleraziun tar ils posts involvids p.ex. cun agid da termins da liquidaziun.

 

- Per simplifitgar la procedura per la permissiun da construcziun duai vegnir extendida ed adattada la glista dals projects da construcziun che na basegnan betg ina permissiun da construcziun (art. 40 OPTGR); las vischnancas duain survegnir la pussaivladad da prevair ulteriuras excepziuns. Er sto vegnir examinada ina procedura electronica per la permissiun da construcziun sco cumplettaziun tar la furma sin palpiri.

 

- En il senn da la proporziunalitad duain mo ils documents e las cumprovas propi necessarias stuair vegnir agiuntads a la dumonda da construcziun. En quest connex sto vegnir prendida en mira in'unificaziun dals documents e da las cumprovas che ston vegnir inoltrads (art. 42 al. 2 OPTGR).

 

- Tar projects da construcziun cumplexs e voluminus duain las vischnancas en cas da basegn pudair sa basar sin il sustegn da las persunas spezialisadas dal chantun Grischun ed eventualmain – en il senn da la subsidiaritad e da l'autonomia da las vischnancas – pudair dumandar sin lur agen giavisch il sustegn dal chantun.

 

En il senn da las consideraziuns qua survart vegn la regenza perquai incumbensada da suttametter al cussegl grond en il rom da la proxima revisiun da la LPTGR e da la OPTGR las suandantas mesiras:

 

1. reducziun da la durada ed acceleraziun da la procedura per la permissiun da construcziun;

 

2. extensiun dals projects da construcziun che na basegnan betg ina permissiun da construcziun tenor l'art. 40 OPTGR ed introducziun da la procedura electronica per la permissiun da construcziun;

 

3. simplificaziun da la procedura per la permissiun da construcziun en il chantun Grischun;

 

4. sustegn da las vischnancas en cas da dumondas da construcziun cumplexas e voluminusas tras il chantun.

 

Cuira, ils 9 da december 2015

 

Crameri, Kunz (Cuira), Koch (Igis), Aebli, Albertin, Alig, Berther (Mustér), Blumenthal, Brandenburger, Burkhardt, Caluori, Casanova (Glion), Casanova-Maron (Domat), Casutt-Derungs, Cavegn, Caviezel (Tavau Clavadel), Claus, Danuser, Davaz, Della Vedova, Dosch, Engler, Epp, Fasani, Felix (Haldenstein), Felix (Scuol), Giacomelli, Grass, Hartmann, Heiz, Hug, Joos, Kasper, Koch (Tumein), Kunfermann, Kunz (Fläsch), Kuoni, Lorez-Meuli, Marti, Mathis, Michael (Castasegna), Monigatti, Müller, Nay, Niederer, Noi-Togni, Papa, Paterlini, Pedrini, Rosa, Salis, Schneider, Schutz, Steiger, Stiffler (Tavau Plaz), Stiffler (Cuira), Tenchio, Thomann-Frank, Tomaschett (Breil), Valär, Vetsch (Claustra Vitg), von Ballmoos, Waidacher, Weber, Wieland, Zanetti, Andri, Berther (Segnas), Costa, Föhn, Natter, Ratti, Spreiter, Tuor

Resposta da la regenza

Actualmain è il chantun londervi d'adattar la lescha davart la planisaziun dal territori per il chantun Grischun (LPTGR) e l'ordinaziun respectiva (OPTGR) sin basa da la revisiun da la lescha federala davart la planisaziun dal territori (LPT 1) ch'è entrada en vigur il 1. da matg 2014. Tenor il plan da termins preschent duai la debatta en il cussegl grond avair lieu l'atun 2017.

Questa revisiun da la LPTGR duai gist er vegnir duvrada per suttametter al cussegl grond tranter auter dumondas e propostas tar las incumbensas ch'èn vegnidas formuladas en l'intervenziun qua avant maun. La regenza è pia pronta d'acceptar questa incumbensa.

 

Concernent ils giavischs concrets ch'èn cuntegnids en l'incumbensa pon vegnir fatgas gia en quest lieu las suandantas remartgas:

Tar l'emprim e tar il terz stritg d'enumeraziun: En la procedura da permissiun datti effectivamain anc potenzial d'optimaziun sin tut ils stgalims, er sche la simplificaziun, l'acceleraziun e la coordinaziun da las proceduras èn gia stads temas impurtants tar l'ultima revisiun da la LPTGR (2004). Confurm a l'incumbensa qua avant maun vegn la proxima revisiun da la LPTGR ad avair la finamira d'examinar cun egl critic e sin basa da las experientschas ch'èn vegnidas fatgas ils termins d'exposiziun e da protesta che valan per dumondas da construcziun sco er ils termins da liquidaziun da las autoritads (che vegnan dal rest observads en 96 % da tut las fatschentas). Il problem il pli grond en connex cun la durada da la procedura n'èn però betg exnum ils termins concrets legals d'exposiziun e da liquidaziun, mabain plitost la circumstanza ch'i vegnan deplorablamain savens inoltrads documents da dumonda insuffizients. Pervia da las prescripziuns materialas adina pli cumplexas èn las petentas ed ils petents sco er las vischnancas, las qualas avessan en sasez l'incumbensa da controllar la cumplettadad dals documents, savens surdumandads. In ulteriur problem è quel che las autoritads d'examinaziun e da permissiun n'han betg adina avunda resursas persunalas per pudair dumagnar las fatschentas entaifer il temp spetgà.

Tar il segund stritg d'enumeraziun: In'examinaziun da la participaziun da las organisaziuns da l'ambient (OPA) a proceduras è gia vegnida annunziada en la resposta a l'incumbensa Parolini da l'onn 2013. Schebain quai accelerass las proceduras, sche las OPA stuessan consegnar lur posiziuns pir suenter che las respostas da consultaziun da las autoritads spezialisadas pertutgadas fissan entradas, sco ch'i vegn proponì en l'incumbensa qua avant maun, è intschert; quai sto anc vegnir examinà pli detagliadamain.

Tar il quart stritg d'enumeraziun: L'incumbensa qua avant maun ha la finamira d'amplifitgar il catalog da projects da construcziun che na basegnan betg ina permissiun ch'è cuntegnì en l'art. 40 OPTGR. Sche quai è admissibel sut l'aspect da la definiziun da la permissiun da construcziun en il dretg federal sco er opportun ord vista d'ina terza persuna ch'è pertutgada d'in project da construcziun, sto vegnir examinà pli profundamain en il rom da la revisiun da la LPTGR. Interessant èsi, che cunzunt las vischnancas èn sa dustadas en l'ultima revisiun da la LPTGR cunter in catalog memia generus. Quai perquai ch'ellas temevan da perder la controlla sur dals fatgs da construcziun sin lur territori communal. Pervia da quai ha stuì vegnir concedì a las vischnancas en l'art. 86 LPTGR il dretg da pudair restrenscher sezzas il catalog. Da quest dretg han er insaquantas dad ellas fatg diever.

La procedura per la permissiun da construcziun electronica menziunada en l'incumbensa è tematisada en la strategia d'informatica da la regenza. Scleriments en quest connex duain vegnir fatgs ils onns 2017/18. En vista a las incumbensas ch'èn sin il program en il sectur da la digitalisaziun (p.ex. cataster da la restricziun da la proprietad da dretg public [RPDP], models minimals da geodatas tenor la legislaziun da geoinfurmaziun) ston dentant er vegnir resguardadas las resursas persunalas e finanzialas da l'uffizi per il svilup dal territori.

Tar il tschintgavel stritg d'enumeraziun: Concernent ils documents che ston vegnir inoltrads per ina dumonda da construcziun datti in basegn d'agir. Tschertas autoritads da permissiun pretendan mintgatant scleriments effectivamain nunnecessaris. – L'art. 80 dal model d'ina lescha da construcziun per vischnancas grischunas procura gia per l'armonisaziun proponida dals documents sin plaun chantunal.

Tar il sisavel stritg d'enumeraziun: En la nova lescha davart il svilup economic (LSE) è vegnì introducì l'instrument per coordinar las proceduras d'in project concret, ed igl èn vegnidas stgaffidas las resursas correspundentas tar l'uffizi per economia e turissem cumpetent. Dal rest tutgi tar la lavur quotidiana dals uffizis chantunals da sustegnair uschè bain sco pussaivel las vischnancas en cas da fatschentas cumplexas u da dumondas giuridicas, sche las resursas persunalas permettan quai e sche quai n'è betg problematic sut l'aspect dal princip da l'imparzialitad da las autoritads da permissiun.

24 da favrer 2016