Sche las ballas en implants da tir vegnan tschiffadas en la terra, resulta terra contaminada en il senn da l'ordinaziun davart la sanaziun da deponias veglias. Tals tschiffaballas ston vegnir sanads. Ils termins da sanaziun e las finamiras da sanaziun sa drizzan tenor la periclitaziun da l'aua sutterrana, dal terren e da las auas da surfatscha sco bains che ston vegnir protegids. Els vegnan prescrits da la confederaziun e fixads dal chantun en in'ordinaziun da sanaziun. 

La sanaziun dal terren contaminà d'in implant da tir vegn sustegnida da la confederaziun cun indemnisaziuns dal fond da l'ordinaziun davart la taxa per sanar deponias veglias (fond OTDV). La cundiziun per survegnir indemnisaziuns OTDV è ch'i n'è dapi l'onn 2012 betg pli vegnì sajettà en la terra en zonas da protecziun da l'aua sutterrana ed ordaifer questas zonas suenter l'onn 2020. En ils implants da tir che vegnan duvrads vinavant ston vegnir installads fin lura sistems da tschiffaballas artifizials. Las indemnisaziuns OTDV importan per implants da tir da 300 meters 8000 francs per schiba, per implants da tir a curta distanza 40 % dals custs da sanaziun imputabels.

En il rom da la cumpilaziun dal cataster dals lieus engrevgiads (CLE) èn en il Grischun vegnids registrads sistematicamain durant ils onns 2000 fin 2004 ils implants da tir da 300 meters. Las vischnancas èn vegnidas infurmadas. Ils implants da tir a curta distanza èn registrads en la glista da la sanaziun cunter la canera. Els èn vegnids integrads en il cataster dals lieus engrevgiads. La periclitaziun dals bains che ston vegnir protegids vegn giuditgada sin basa da la charta per la protecziun da las auas e da la planisaziun d'utilisaziun. Sin basa da quai vegnan fixads ils termins e las finamiras da sanaziun. Sin giavisch da las vischnancas fa l'uffizi per la natira e l'ambient (UNA) inspecziuns dals implants da tir e redigia mintgamai in rapport davart l'examinaziun istorica tenor l'ordinaziun davart la sanaziun da deponias veglias inclusiv ina stimaziun generala dals custs da dismessa.

Vischnancas che han in implant da tir che vegn duvrà èn obligadas d'installar fin la fin da l'onn 2020 sistems da tschiffaballas artifizials u da serrar l'implant. La tematica da la gestiun futura d'implants da tir en il chantun è vegnida coordinada tranter ils posts da servetsch participads. Latiers tutgan l'uffizi da militar e da protecziun civila (UMPC), l'uffizi da chatscha e pestga (UCP) (implants da chatscha) l'uffizi per il svilup dal territori (planisaziun), il UNA (canera/contaminaziun/protecziun dal terren) sco er da l'uffizier federal da tir (segirezza). La finamira concordanta è quella da pudair concentrar il manaschi da tir sin main implants da tir, ch'èn percunter adattads e ch'èn libers da conflicts. La tendenza ad implants da tir regiunals duai vegnir promovida vinavant. Sch'i vegniss sajettà vinavant en tschiffaballas da terra suenter l'onn 2020, perdessan il chantun e las vischnancas indemnisaziuns OTDV da var 5,6 milliuns francs che la confederaziun pajass per sanar ils tschiffaballas da terra. La finamira dal UMPC e dal UCP è perquai quella ch'i n'èn en funcziun a partir da l'onn 2020 pli nagins implants da tir, tar ils quals n'è betg vegnì installà in sistem da tschiffaballas artifizial.

La regenza respunda las dumondas concretas sco suonda:

1. Actualmain datti 102 implants da tir da 300 meters e 199 implants da tir a distanza curta.

2. En las zonas da protecziun da l'aua sutterrana èn vegnids sanads tut ils tschintg tschiffaballas da terra ch'èn en funcziun ed in che n'è betg en funcziun. In ulteriur tschiffaballas da terra che n'è betg en funcziun e che sa chatta en ina zona da protecziun da l'aua sutterrana n'è anc betg vegnì sanà.

3. 34 tschiffaballas ch'èn en funcziun èn vegnids sanads.

4. Anc 253 tschiffaballas ch'èn en funcziun ston vegnids sanads.

5. Ils custs, cun ils quals i sto anc vegnir fatg quint per sanar tut ils tschiffaballas ch'èn en funcziun e che n'èn pli en funcziun, vegnan stimads – sin basa da las valurs medias da las sanaziuns ch'èn gia vegnidas fatgas – a circa 18,9 milliuns francs. En quest connex pon vegnir spetgadas indemnisaziuns OTDV da la confederaziun dad 8,2 milliuns francs e contribuziuns dal chantun da 3 milliuns francs als custs da perdita. Circa 7,7 milliuns sto pia vegnir surpigliads da las vischnancas.

6. Tschiffaballas da terra na ston betg vegnir sanads obligatoricamain avant l'installaziun da tschiffaballas artifizials. Il termin da sanaziun vegn fixà dal UNA.

7. Ils custs per sistems da tschiffaballas artifizials e per las mesiras architectonicas dastgassan importar tranter 5000 e 10 000 francs per schiba.

8. Fin oz èn vegnids equipads 44 tschiffaballas cun sistems artifizials.

9. Fin la fin da l'onn 2020 ston anc 68 implants da tir da 300 meters e 185 implants da tir a distanza curta vegnir equipads cun sistems da tschiffaballas artifizials.

10. Per installar sistems da tschiffaballas artifizials na vegnan pajadas ni contribuziuns federalas ni chantunalas. Ils custs da cumpra e d'installaziun stimads che vegnan presumads a 5 fin 9 milliuns francs ston vegnir purtads da las vischnancas e da las uniuns da tiradurs.

Ils custs per sanar ils 20 implants da tir sin discs n'èn betg cuntegnids en questas cifras. Pervia da la surfatscha bler pli gronda e pervia da las cumposiziuns pli cumplexas da substanzas nuschaivlas èn quels custs da sanaziun bler pli auts che tar implants da tir convenziunals.

14 da zercladur 2016